नयाँदिल्ली- भारत उत्तराखण्डमा पर्ने ‘द्रौपदी डाँडा-२’ हिमालमा आएको हिम पहिरोमा परी कम्तिमा चार पर्वतारोहीको मृत्यु भएको छ। घटनामा दर्जनौं बेपत्ता छन्।
हिम पहिरो खस्दा ३४ प्रशिक्षार्थी र सातजना प्रशिक्षक आरोहण अभ्यासमा थिए। उक्त हिमाल पाँच हजार ६७० मिटर अग्लो छ। नेहरु इन्स्टिच्युट अफ माउन्टेनियरिङबाट प्रशिक्षार्थीहरूको टोली उक्त हिमालमा आरोहण अभ्यासमा थिए।
३३ आरोही हिम पहिरोमा फसेको र आठजनाको सकशुल उद्धार गरिएको अधिकारीहरूले जनाएका छन्। उत्तराखण्डको विपद रेस्पोन्स फोर्सका अधिकारी रिद्धिम अग्रवालका अनुसार खराब मौसमका बावजुद उद्धार प्रयास जारी छ।
उक्त इन्स्टिच्युटले डोकरानी बामक ग्लेसियर आसपासमा २२ सेप्टेम्बरदेखि बेसिक र एडभान्स प्रशिक्षण सञ्चालन गरिरहेको थियो। बेसिकतर्फ ९७ प्रशिक्षार्थी, २४ प्रशिक्षक र इन्स्टिच्युटका एक अधिकृत सामेल थिए। यस्तै, एडभान्स कोर्सतर्फ ४४ प्रशिक्षार्थी, ९ प्रशिक्षकसहित ५३ जना सहभागी थिए।
