कैलाली। धनगढी उपमहानगरपालिकाको क्षेत्राधिकारभित्र पर्ने खुटिया खोलाको बेली क्षेत्रमा वातावरणीय अध्ययन तथा कानुनी प्रक्रिया पूरा नगरी नदीजन्य पदार्थ उठाउन पुगेका दर्जनौँ ट्र्याक्टरलाई प्रहरीले फर्काइदिएको छ।
शुक्रबार बिहानै खुटिया खोलाको बेली क्षेत्रमा नदीजन्य पदार्थ उठाउन पुगेका ट्र्याक्टरलाई प्रहरीले रोकेर वातावरणीय अध्ययन तथा आवश्यक कानुनी प्रक्रिया पूरा नगरी नदीजन्य पदार्थ उत्खनन गर्न नमिल्ने भन्दै फिर्ता पठाएको हो।
जिल्ला प्रहरी कार्यालय कैलालीका प्रहरी उपरीक्षक नरेन्द्र चन्दका अनुसार कानुनले तोकेको प्रक्रिया पूरा नगरी नदीजन्य पदार्थ उत्खनन तथा संकलन गर्न खोजिएपछि प्रहरी परिचालन गरिएको हो।
“वातावरणीय अध्ययनलगायत आवश्यक कानुनी प्रक्रिया पूरा नगरी नदीजन्य पदार्थ उत्खनन गर्न पाइँदैन। कानुनले तोकेको मापदण्ड पूरा गरेर मात्रै काम गर्नुपर्छ,” प्रहरी उपरीक्षक चन्दले भने।
खोलामा पुगेका ट्र्याक्टर मात्र नभई राजस्व संकलनका लागि पुगेको धनगढी उपमहानगरपालिकाको नगर प्रहरी टोलीलाई समेत प्रहरीले फिर्ता पठाएको बताइएको छ।
प्रहरीले कानुनी मापदण्ड पूरा नगरी राजस्व संकलन गर्नसमेत नमिल्ने भन्दै नगर प्रहरीलाई फिर्ता पठाएको थियो। यस बिषयमा उपमहानगरपालिकाका कुनै पनि कर्मचारी बोल्न मान्दैनन । एक कर्मचारीले भने -“सर मेरो कहिकतै नाम आयो भने मेरो जागिर जान्छ । त्यस कारण प्लिज मेरो नाम उल्लेख नगरिनु होला ।
खोलाबाट नदीजन्य पदार्थ उत्खननको समय नजिकिँदै गर्दा स्थानीय तह र प्रहरीबीच अधिकार तथा कानुनी प्रक्रियाको विषयले समेत चर्चा पाएको छ। वातावरणीय अध्ययनबिनै खोलामा मेसिन तथा ट्र्याक्टर पुग्ने क्रम रोक्न प्रहरीले सक्रियता देखाएपछि उपमहानगरपालिकाले समेत सार्वजनिक सूचना जारी गरेको हो।
अब प्रश्न उठेको छ, वातावरणीय अध्ययन र कानुनी प्रक्रिया पूरा नगरी खोलामा ट्र्याक्टर कसरी पुगे? र राजस्व उठाउने तयारीमा नगर प्रहरी किन खोलामै पुग्यो? यस विषयमा सम्बन्धित निकायले स्पष्ट जवाफ दिनुपर्ने देखिन्छ।