काठमाडौं- रेस्टुराँहरूले सर्भ गर्ने चाइनिज स्टाइलको फ्राई राइस विदाको उपयोग गर्दै घरमै पनि बनाउन सकिन्छ। सेफ्स बर्गरका आउटलेटहरूमा फ्राई राइसका पारखीहरूले यो परिकार खुबै मन पराउनुभएको छ।

आजको प्रस्तुतिमा खानाको यो परिकारको बारेमा चर्चा गर्दैछु।

आवश्यक सामग्री

(१) स्लाइस गरिएको प्याज- १५ ग्राम
(२) लसुनका टुक्रा- १० ग्राम
(३) सिंगो अण्डा- एउटा
(४) नुन र मरिचको धुलो
(५) गार्लिक पाउडर (लसुनको धुलो)- ५ ग्राम
(६) तिलको तेल- ५ एमएल
(७) तिलको धुलो- ५ ग्राम
(८) हरियो प्याजको पत्ता- ५ ग्राम
(९) बासमती चामल- २०० ग्राम

बनाउने तरिका

तिलको तेल कराहीमा तताउने। तातेपछि त्यसमा स्लाइस गरिएको प्याज, लसुनका टुक्रा हाल्ने। अनि खैरो रंग आउन्जेल भुट्ने।

त्यसपछि अण्डा फोरेर हाल्ने। त्यसपछि अण्डाको टुक्रा-टुक्रा हुने गरी मिक्स गर्ने।

त्यसमा पाकेको बासमतीको भात हाल्ने। त्यसलाई मज्जाले पन्युले चलाउने। र, मिक्स गर्ने।

त्यसपछि नुन, मरिचको धुलो, गार्लिक पाउडर, हरियो प्याजको पत्ता हाल्ने। ती सबैलाई पन्युले राम्ररी चलाउने। त्यसपछि तिलको धुलो हाल्ने। र, सबैलाई पन्युले राम्ररी चलाएपछि चाइनिज स्टाइल फ्राई राइस खानका लागि तयार भयो।

माथिको परिमाणमा बनाइएको फ्राई राइस एकजनाका लागि मात्र हो। धेरैजनाका लागि बनाउनुपर्दा त्यसरी नै सामग्रीहरू थप्दै जानुपर्छ।

(लेखक तामाङ सेफ्स बर्गर नेपालका संस्थापक तथा एक्जुकेटिभ सेफ हुन्)