कैलाली। रसुवामा आएको विनाशकारी बाढीबाट प्रभावित नागरिकको राहत तथा उद्धारका लागि निर्माण व्यवसायी संघ कैलालीले आर्थिक सहयोग गरेको छ।
संघले प्रधानमन्त्री राहत तथा उद्धार कोषमा २ लाख ११ हजार १११ रुपैयाँ सहयोग उपलब्ध गराएको हो।
विपत्तिको पीडामा परेका नागरिकसँग ऐक्यबद्धता जनाउँदै संघले आफ्नो सामाजिक उत्तरदायित्वअन्तर्गत उक्त सहयोग गरेको संघका अध्यक्ष दीर्घराज जोशीले जानकारी दिए।
‘विपद् जहाँ आए पनि पीडा सबै नेपालीको साझा पीडा हो’ भन्ने भावनाका साथ राहत तथा उद्धार कार्यमा थोरै भए पनि योगदान पुरयाउने उद्देश्यले सहयोग गरिएको अध्यक्ष जोशीले बताए।
रसुवाको बाढीले ठूलो जनधनको क्षति पुरयाएको अवस्थामा पीडितको उद्धार, राहत र पुनःस्थापनाका लागि सहयोगी हातहरू अघि बढिरहेका छन्। निर्माण व्यवसायी संघ कैलालीको यो सहयोगले विपत्तिमा मानवीयता र सामाजिक एकताको सन्देश दिएको छ।