काठमाडौं- दशैं, तिहार तथा छठ पर्व मनाउन घर जाने यात्रुलाई लक्षित गरी सरकारले आजदेखि अग्रिम टिकट बुकिङ खुला गरेको छ।
देशका विभिन्न क्षेत्रबाट संघीय राजधानी काठमाडौंमा अध्ययन, व्यापार, व्यवसाय तथा रोजगारीका लागि आएकाहरू चाडपर्व मनाउन घर जाने भएकाले अग्रिम टिकट बुकिङ खुला गरिएको हो। हरेक दशैंमा एकैपटक लाखौं व्यक्तिले काठमाडौं छाड्ने गर्छन्। सोही कारण यात्रुको भीड बढ्ने भएकाले विगतदेखि नै दशैं अगाडि टिकटको अग्रिम बुकिङ खुला गरिँदै आएको छ। यातायात व्यवसायी, ट्राफिक प्रहरी र सरोकारवाला निकायको सहकार्यमा २२ भदौको बैठकको निर्णयअनुसार यातायात व्यवस्था विभागले आजदेखि अग्रिम टिकट बुकिङ खुला गरेको हो।
नेपाल यातायात व्यवसायी राष्ट्रिय महासंघका अध्यक्ष विजयबहादुर स्वाँरले लामो तथा मध्यम दूरीका यात्रुका लागि अग्रिम टिकट बुकिङ खुला गरिएको जानकारी दिए। नयाँ बसपार्क, चाबहिल, गौशाला, कोटेश्वर, सुन्धारा र कलंकीलगायत स्थानबाट अग्रिम टिकट बुकिङ शुरु गरिएको उनले बताए।
उनका अनुसार पश्चिमका धनगढी, टीकापुर, बझाङ, बाजुरा, सल्यान, रुकुम, प्यूठान, रोल्पा तथा पूर्वका ताप्लेजुङ, इलाम, काँकडभिट्टा, उदयपुरलगायत स्थानमा जान अग्रिम टिकट बुकिङ खुला गरिएको छ। यातायात व्यवसायीले भने देशका मुख्य सडकलाई मर्मतसम्भार गरी यातायात सञ्चालनलाई सहज बनाउन सम्बन्धित निकायसँग अनुरोधसमेत गरेका थिए।
यस वर्षको अग्रिम टिकट बुकिङ खुला गर्न नयाँ बसपार्क सञ्चालन गर्दै आएको लोत्से बहुउद्देश्यीय प्रालिले यातायात व्यवसायीको सहकार्यमा टिकट बुकिङ काउन्टर थपेको छ। प्रालिका मानव संशाधन प्रमुख पंकज मल्लले दशैंमा घर जाने यात्रुलाई व्यवस्थित रूपमा टिकट प्रदान गर्न बस टिकट काउन्टर थपिएको जानकारी दिए।