नेपाली चलचित्र ‘प्रेमगन्ज‘ भारतमा पनि प्रदर्शन हुने भएको छ। चलचित्र चौतारी र ड्रिम्स थिएटर मोसन पिक्चरबीच भएको सम्झौताअनुसार ‘प्रेमगन्ज’ पहिलो चरणमा भारतका कोलकाता, देहरादुन, आसाम, गुवाहाटी, अरुणाचल, बैङ्लोर, मुम्बई, दिल्ली, दार्जिलिङ, सिक्किमलगायत शहरका एक सयभन्दा धेरै स्क्रिनमा एकसाथ प्रदर्शन हुने भएको छ।
पहिलो चरणको प्रदर्शन सकारात्मक देखिएमा दोश्रो चरणमा भारतका अन्य ठूला शहरमा पनि प्रदर्शन हुनेछ। प्रेमगन्ज नेपाल–भारत दुवै देशमा एउटै मिति ३ भदौमा प्रदर्शन हुनेछ। लाखौं नेपाली र नेपालीभाषी बसोबास गर्ने भारतमा ‘प्रेमगन्ज’ चलचित्र नेपाली भाषामै प्रदर्शन हुन लागेको हो, जसमा अंग्रेजी सब–टाइटल पनि हुनेछ।
प्रेमगन्जलाई ड्रिम्स थिएटर मोसन पिक्चरका सञ्चालक म्याबो ह्यङले अल इन्डिया वितरण गर्न लागेका हुन्। फिल्म राम्रो बनेको र भारतमा पनि नेपाली चलचित्रको बजारको सम्भावना ठूलो रहेकाले राम्रो कमाइ गर्नेमा आफू विश्वस्त रहेको उनले बताए। नेपाली चलचित्रलाई भारतीय बजारसम्म लैजान कालिम्पोङका कलाकार अनुज शर्मा र सिक्किमका कलाकार अमीर मेघीले सहजीकरण गरेका हुन्।
परिच्छेद सेनको निर्देशनमा बनेको यस चलचित्रमा तेज गिरी, बेनिशा हमाल, सम्पदा बानियाँलगायत कलाकारको अभिनय छ। यस्तै, फिल्ममा पवन भट्टराई, सुप्रिया खनाल, राइडर प्रशान्त, सिमरन खड्का, नरेश पौडेल, रश्मी भट्ट, सञ्जोग रसाइली र गीता अधिकारीको पनि अभिनय देख्न सकिन्छ।
स्पट ब्वायका रूपमा लामो समय काम गरेका राजु फुयालको प्रस्तुति रहेको फिल्म चलचित्र चौतारीको ब्यानरमा बनेको हो। यस चलचित्रका कार्यकारी निर्माता अनन्तमान श्रेष्ठ हुन्। सञ्जय लामाको छायांकन रहेको चलचित्र डेढ करोडको लगानीमा बनेको हो।
