कैलाली- कैलालीको धनगढीमा अपांगता भएकाहरुको लागि पुनर्स्थापनासहितको अस्पताल सञ्चालनमा आउने भएको छ । अस्पताल सञ्चालनका लागि धनगढी उपमहानगरपालिका र अपांगता बाल अस्पताल तथा पुनर्स्थापना केन्द्र, काभ्रेपलान्चोकबीच सम्झौता भएको छ ।
धनगढी उपमहानगरपालिका–७ देवहरियाको शिव माध्यामिक विद्यालयको परिसरमा रहेको आधारभूत स्वास्थ्य सेवा केन्द्र र वर्थिङ सेन्टरको भवनमा प्रदेश स्तरको पुनर्स्थापनासहितको अस्पताल सञ्चालनको लागि दिइने सम्झौतामा उल्लेख गरिएको छ ।
अपांगता बाल अस्पताल तथा पुनर्स्थापना केन्द्र, काभ्रेपलान्चोकले धनगढीमा शाखाका रुपमा अस्पतालसहितको पुनर्स्थापना केन्द्र सञ्चालन गर्न सम्झौता गरेको धनगढी उपमहानगरपालिकाका प्रमुख मेयर गोपाल हमालले बताए ।
१०० शैय्या क्षमताको अस्पतालबाट १८ वर्ष मुनिका अपांगता भएका बालबालिकाको शल्यक्रिया लगायतका सेवा केन्द्रले दिने गरि सम्झौता भएको उपमहानगरपालिकाले जानाएको छ ।