कैलाली- कैलाली अधिकांश स्थानहरूमा पछिल्लो ६ घण्टादेखि भारी वर्षा भइरहेको छ। यहाँका साना ठुला नदीमा पनि बहाव बढिरहेको छ ।
जिल्ला प्रशासन कार्यालय कैलालीका सूचना अधिकारी शिवराज जोशीले पानी परिरहेको हुँदा तटीय क्षेत्रहरू र डुबान भइरहने होचा भू–भागमा उच्च सतर्कता अपनान भनिसकेको जानकारी दिए । कैलालीका सबै नदीमा पानीको बहाव सतर्कतातह नजिक पुगेको जोशीले जानकारी दिए ।
खुटिया नदीमा वार्निङ लेबल ४ मिटर हुँदा बिहान ६ बजेसम्मको अवस्थामा २।८६ पुगिसकेको छ । कर्णाली चिसापानीमा पानीको सतह ८।०५ पुगेको छ भने मोहनामा २।६ मिटर पुगेको छ । कर्णालीमा वार्निङ लेबल १० र मोहनामा ३ रहेको छ ।
सबैभन्दा धेरै पानीको बहाव कन्द्रा नदीमा बढिरहेको छ । यहाँ वार्निङ लेबल ४।५ हुँदा पानीको तह ४।४३ मिटर पुगिसकेको छ । नदीमामा पानीको सतह बढ्दै गइरहेको छ । जसका कारण कैलालीका दक्षिण क्षेत्र डुबानको खतरामा परेका छन् ।
‘अहिले पनि पानी रोकिएको छैन । नदी बढिरहेको छ । अझै बढ्दै जाँदा नदी तटीय क्षेत्र, डुबान भइरहने होचा भू–भागमा नदी पस्न सक्छ’ सूचना अधिकारी जोशीले भने ‘ती क्षेत्रहरूमा अहिलेबाटै हामीले सुरक्षित रहन भनिसकेका छौँ ।’
यसैगरी कैलाली जिल्लाका अधिकांश स्थानमा मंगलबार रातिदेखि भारी वर्षा भएको जल तथा मौसम विज्ञान विभागले जनाएको छ।
विभागका अनुसार कैलालीको धनगढी विमानस्थलमा ६ घन्टामा ९०।२ मिलिमिटर वर्षा भएको छ। जल तथा मौसम बिभागले एक एलर्ट जारी गर्दै सबैलाई सुचना प्रबाह समेत गरेको छ ।
