काठमाडौँ । मेक्सिकोको फुटबल खेल जारी रहेको अवस्थामा शनिबार हिंसा भड्कँदा कम्तीमा २२ जना घाइते भएका छन् । मैदानमा झडप भएसँगै २२ जना घाइते भएका हुन् ।
क्वेरेटारो शहरको ला कोरेगिदोरा स्टेडियममा क्वेरेटारो र एटलसबीचको खेल – ‘२०२२ क्लाउसुरा फुटबल प्रतियोगिता’को नवौं राउण्डमा ६३ औं मिनेट चल्दै थियो । यसैबीच विपक्षी र प्रशंसकबीच झगडा शुरु भएको थियो ।
सुरक्षा गार्डले प्रशंसकलाई सुरक्षित स्थानमा पुग्न अनुमति दिन स्टेडियमको ढोका खोल्दा, केहीले खेल रोक्न र खेलाडीलाई लकर कोठामा पठाउन बाध्य पारेर हानाहान जारी राखेका बताइएको छ । मानिसको मृत्यु भएको कुनै समाचार प्राप्त भएको छैन ।
तर, २२ जना घाइते भएका र तीमध्ये दुई जनाको अवस्था गम्भीर रहेको बताइएको छ । क्वेरेटारो राज्यको नागरिक सुरक्षाले खेल रद्द भएको जानकारी दिएको छ ।
क्वेरेटारो क्लबले एक विज्ञप्ति प्रकाशित गरी हिंसाको निन्दा गरेर र हिंसामा जिम्मेवार जो कोहीविरुद्ध कडा कारबाही माग गरेको छ ।
