काठमाडौं- मंगलबार देशका केही स्थानमा मेघ गर्जन र चट्याङसहित हल्कादेखि मध्यम वर्षाको सम्भावना रहेको जल तथा मौसम विज्ञान विभागले जनाएको छ।

विभागको मौसम पूर्वानुमान महाशाखाका अनुसार हाल देशभर आंशिक बदली रही मधेश, वागमती र प्रदेश १ का १-२ स्थानमा हल्का वर्षा भइरहेको छ।

मंगलबार दिउँसो प्रदेश १, मधेश, वागमती र गण्डकीमा आंशिकदेखि सामान्य बदली रही बाँकी प्रदेशमा आंशिक बदली रहनेछ। प्रदेश १, वागमती र गण्डकीका थोरै स्थानमा र बाँकी प्रदेशका १-२ स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ।

यस्तै, राति देशभर आंशिकदेखि सामान्य बदली रहनेछ। प्रदेश १, मधेश र गण्डकीका थोरै स्थान तथा बाँकी प्रदेशका १-२ स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ।