नेपालमा रातो क्रान्ति आएको छ,
दौडिएका छन् सबै
रातो सिलिन्डर बोकेर !

जमिनबाट हेर्दा लाइन
आकाशबाट हेर्दा लाइन
अन्तरिक्षबाट हेर्दा पनि लाइन
चीनको पर्खालले समेत सोध्दैछ-
मभन्दा लामो को आयो यो ?

बुढा लाइनमा,
बुढी लाइनमा,
तन्नेरी लाइनमा,
देशको भविष्‍य पनि
सिलिन्डर बोकेर लाइनमै !

कसैले भन्यो-
कति दुःख पाएछन् जनताले
अर्कोले भन्यो-
चुप लाग
यो त आत्मनिर्भर नेपालको
लाइभ डेमो हो !

जनता सराप्दैछन्
ग्यास छैन, सरकार छैन,
तर, सिलिन्डर समातेर
लाइन छाडेका छैनन् !

ठग्गाले बडका भलमन्सालाई सोधेछ-
काका,
यो कस्तो क्रान्ति हो ?

बडका भलमन्साले भनेछन्-
ए भतिज,
पहिले जनता लाइनमा थिए
अब लाइन नै जनता भयो !

ठग्गाले फेरि सोधेछ-

अनि सरकार कहाँ छ काका ?
काका मुसुक्क हाँसेछन्
सरकार ?
त्यो त अगाडि नै छ
मोबाइल बोकेर
क्रान्तिको उद्घाटन गर्न !