कैलाली । विश्व युवा दिवसको अवसरमा नेपाल युवा उद्यमी मञ्च (NYEF) कैलालीले आयोजना गरेको रक्तदान कार्यक्रममा ३० जना स्वयंसेवी रक्तदाताले रक्तदान गरेका छन्। कार्यक्रममा ३० पिन्ट रगत संकलन भएको छ।
नेपाल रेडक्रस सोसाइटी रक्तसञ्चार सेवा केन्द्रमा आयोजित कार्यक्रममा युवादेखि समुदायका सदस्यसम्मले उत्साहपूर्वक सहभागिता जनाएका थिए। रक्तदानमार्फत मानवीय सेवामा योगदान पुर्याउने सम्पूर्ण रक्तदाताप्रति NYEF कैलालीले आभार व्यक्त गरेको छ।
NYEF कैलालीका अध्यक्ष आयुष हमालले रक्तदान कार्यक्रम सफल बनाउन सहयोग गर्ने, कार्यक्रमको जानकारी फैलाउने तथा अरूलाई रक्तदानका लागि प्रेरित गर्ने सबैप्रति धन्यवाद व्यक्त गरे।
अध्यक्ष हमालले विश्व युवा दिवसको अवसरमा आयोजित अभियानले युवालाई सामाजिक उत्तरदायित्व, मानवीय सेवा र स्वयंसेवी भावनासँग जोड्ने महत्वपूर्ण सन्देश दिएको बताए।
“रगतको आवश्यकता परेको समयमा एउटा पिन्ट रगतले पनि कसैको जीवन बचाउन सक्छ,” अध्यक्ष हमालले भने, “त्यसैले रक्तदानलाई एकदिने अभियानमा सीमित नगरी नियमित मानवीय सेवाका रूपमा अघि बढाउनुपर्छ।”
युवा तथा समुदायका सदस्यहरूको उत्साहजनक सहभागिताले अभियानलाई थप प्रभावकारी बनाएको उल्लेख गर्दै हमालले NYEF कैलालीले आगामी दिनमा पनि नियमित रक्तदान कार्यक्रम सञ्चालन गर्दै जाने प्रतिबद्धता व्यक्त गरे।
