२१ वर्षअघि क्याम्ब्रिज विश्वविद्यालयको पुस्तकालयबाट चोरी भएका चार्ल्स डार्बिनका दुईवटा हस्तलिखित जर्नललाई अज्ञात मानिसले पुस्तकालयमा फिर्ता गरेको छ। झोलामा एक सानो कागजमा लाइब्रेरियनलाई इस्टरको शुभकामना टाइप गरेर लेखिएको पाइयो।
जर्नल सन् २००१ देखि हराएको थियो। तर, शुरुमा लाइब्रेरीका स्टाफले जर्नल पुस्तकालयकै गलत स्थानमा राखिएको हुन सक्ने आशंका गरेका थिए। त्यसैले तिनले पुस्तकालयमा व्यापक खोजी गरे। एक करोड पुस्तक, नक्सा, पाण्डुलिपी र अन्य सामग्री रहेको पुस्तकालयमा लामो खोजपछि अक्टोबर २०२० मा पुस्तकालयले जर्नल हराएको उजुरी गरेको थियो।
प्रहरीले सो जर्नलको खोजीका लागि इन्टरपोललाई समेत सूचित गर्यो र विश्वविद्यालयले जर्नलबारे कुनै पनि सूचना प्राप्त भएमा आफूहरूलाई सूचित गर्न आग्रह गरेको थियो।
तर, हराएको घोषणा भएको डेड वर्षपछि ती दुई डायरी अज्ञात स्रोतले पुस्तकालयमै राखिदिएको पाइएको छ। ती सामग्री १७ तल्ले लाइब्रेरी भवनको चौथो तल्लामा रहेको लाइब्रेरियनको कार्यालयबाहिर भुइँमा राखिएको पाइएको थियो। दुवै डायरी एउटा गुलाबी गिफ्ट ब्यागमा थिए, जहाँ डायरी राखिएको थियो। जर्नल राखिएको ठाउँमा सीसीटीभीले भिडियो खिच्दैन।
चाल्ड डार्विन आफैंले लेख्ने गरेका ती जर्नल राम्रो अवस्थामा रहेको र तिनमा कुनै छेडखानीको निशान नभेटिएको लाइब्रेरीका अधिकारीले बताए।
डार्बिनका नोटबुक हराएको र अहिले अकस्मात फिर्ता भएको मुद्दामा प्रहरीले अनुसन्धान गरिरहेको लाइब्रेरी प्रशासनले बताए। सोही कारण चोर्नेले नै ती जर्नल फर्काएको हुनसक्ने आशंका गरिएको छ।
सन् २०१७ मा क्याम्ब्रिज विश्वविद्यालयको पुस्तकालय सेवाकी निर्देशक रहेकी डा. जेसिका गार्डनरका अनुसार पाण्डुलिपि भेटिएको स्थानलाई सीसीटीभीले खिच्न नगरे पनि भवन प्रवेश गर्ने र बाहिरिने स्थानका सीसीटीभी फुटेजमार्फत दोषीको खोजी भइरहेको बताइन्। यसका लागि ती स्थानका सीसीटीभी अर्काइभ प्रहरीलाई बुझाइएको उनले बताइन्।
गार्डनरले ती नोटबुकहरू पुस्तकालयमा उन्नत विधि प्रयोगमा ल्याउनुअघि नै हराएको पनि जानकारी दिइन्। भविष्यमा थप सुरक्षा प्रोटोकल लागू गरेर चोरीको सम्भावना कम गरिने उनको भनाइ छ।
द गार्जियनबाट
