कैलाली– कञ्चनपुरमा खाल्डोमा जमेको पानीमा डुबेर बेपत्ता भएका तीन किशोरीको शव फेला परेको छ।

सोमबार पुनर्वास नगरपालिका-५ रातोखोलाको पानीका डुबेर सोही ठाउँका १५ वर्षीया लक्ष्मी बोगटी, १५ वर्षीया सृजना बोगटी र १६ वर्षीया आरती बोगटीको मृत्यु भएको जिल्ला प्रहरी कार्यालय कञ्चनपुरले जानकारी दिएको छ।

डुबान भएको खुल्ला क्षेत्रमा पौडी खेल्ने क्रममा उनीहरू तीनै जना बेपत्ता भएका थिए। लक्ष्मी र सृजनाको शव फेला परेको केही घण्टापछि आरतीको शव फेला परेको जिल्ला प्रहरी कार्यालय कञ्चनपुरका डीएसपी उमेश जोशीले जानकारी दिए।

१२ वर्षकी अञ्जली बोगटी पनि सँगै पौडी खेल्न गएकी थिइन्। तर उनी पौडी नखेलेर फिर्ता आएको र उनले तीन जनालाई खोलाले बगाएको बताएपछि प्रहरीले उनीहरूको खोजी सुरु गरेको थियो। त्यसको केही घण्टापछि उनीहरू तीनै जनाको शव फेला परेको हो।