काठमाडौं- ५ पुस ०७७ मा तत्कालीन प्रधानमन्त्री केपी ओलीले गरेको असंवैधानिक संसद् विघटनविरुद्ध सर्वोच्च अदालतमा बहस गरेको अभियोगमा एमाले नेता कृष्णभक्त पोखरेल अध्यक्ष केपी ओलीको कोपभाजनमा परेका छन् ।
पार्टीको दशौं महाधिवेशनमा अध्यक्ष ओलीले पढेर सुनाएको केन्द्रीय सदस्यहरूको सूचीमा त उनी अटाएनन् नै, आइतबार मनोनित ४३ केन्द्रीय सदस्यको सूचीमा पनि उनी परेनन् । जब कि, त्यस सूचीमा विवादास्पद व्यापारी दुर्गा प्रसाईं पनि परेका छन् ।
एमालेलाई २ जेठ ०७५ को अवस्थामा फर्काउने बाचा पनि अध्यक्ष ओलीले नगरेका होइनन् । तर, नवौँ जिल्ला अधिवेशनबाट चितवनका निर्वाचित जिल्ला अध्यक्ष पोखरेलको पद बहाली भएन । पार्टीभित्र विवाद चर्किंदै गर्दा ओलीले पोखरेललाई हटाएर राष्ट्रियसभा सांसद पार्वती रावललाई अध्यक्षको जिम्मेवारी दिएका थिए ।
पार्टी विभाजनको तयारीमा रहेको माधवकुमार नेपाल नेतृत्वको समूहलाई छाडेर पोखरेल ७ चैत ०७७ मा एमालेमै फर्केका थिए । विवादबीच एमाले २ जेठ ०७५ को अवस्थामा फर्किएको घोषणा गरिए पनि ओलीले निरन्तर पोखरेललाई कोपभाजनको शिकार बनाएका छन् ।
चितवन क्षेत्र नम्बर २ मा लोकप्रिय रहेका पोखरेल एमालेलाई सधैँ एक सिट जिताउन सक्ने नेता हुन् । ०६४ र ०७० सालका संविधानसभा निर्वाचनमा पोखरेलको निर्वाचन क्षेत्रमा एमाले तेस्रो स्थानमा थियो । ०७४ सालको नेतृत्वमा पोखरेलले प्रतिद्वन्द्वीभन्दा १७ हजार मतको फराकिलो अन्तरमा सानदार विजय हासिल गरेका थिए ।
तर, त्यस विजयको प्रभाव एमाले अध्यक्ष केपी ओलीमा रहेको देखिएन । आफ्नो असंवैधानिक कदमविरुद्ध सर्वोच्च अदालतमा बहस गरेको रिस फेर्न ओलीले उनको राजनीतिक यात्रामै बिराम लगाउन खोजेको देखिएको छ ।
पोखरेललाई ओलीले कोपभाजनको शिकार बनाएका चितवनमा तीव्र असन्तुष्टी प्रकट भइरहेको छ । एमाले चितवनका युवा नेता प्रकाश ढुंगानाले सामाजिक सञ्जालमा लेखेका छन्, ‘जसको नेतृत्वमा एमालेले चितवनको ७ मध्ये ६ स्थानीय तहमा शानदार विजय प्राप्त ग¥उो ! उहाँकै नेतृत्वमा संघ र प्रदेशमा अभूतपूर्व विजय हासिल भयो र उहाँ आफैंले विपक्षी उम्मेदवारभन्दा १७००० बढी मत प्राप्त गरेर शानदार रूपमा विजयी हुनुभयो ! चितवन महाधिवेशन सफल पार्न अहोरात्र खट्नुभयो तर पनि नेतृत्वको नजरमा पर्नुभएन ! र पनि, हामीलाई विश्वास छ, तपाईंको निष्ठा रत्तिभर डगमगाउने छैन !’
