बोलिभिया- बोलिभियाको एक सैनिक शिविरमा भएको शक्तिशाली विस्फोटमा मृत्यु हुने सैनिकको संख्या नौ पुगेको रक्षा मन्त्रालयले सोमबार जनाएको छ । भग्नावशेषबाट थप तीन सैनिकको शव फेला परेपछि मृतकको संख्या बढेको हो ।

राजधानी ला पाजबाट करिब ३० किलोमिटर दक्षिणपश्चिममा रहेको भियाचा सहरस्थित सैनिक ब्यारेकमा शुक्रबार दुईवटा शक्तिशाली विस्फोट भएका थिए ।

रक्षा मन्त्रालयका अनुसार उक्त स्थानमा जफत गरिएका पटाका, ग्रिनेड तथा टीएनटीमा आधारित विस्फोटक पदार्थ भण्डारण गरिएको थियो ।

रक्षा मन्त्रालयले जारी गरेको विज्ञप्तिमा सेनाले सोमबार भग्नावशेषबाट नवौं शव फेला पारेको उल्लेख गरेको छ ।

मृत्यु हुने नौ जनामध्ये एक जना हवल्दार र आठ जना अनिवार्य सैनिक सेवामा रहेका युवा सैनिक रहेको मन्त्रालयले जनाएको छ ।

अझै पाँच सैनिक बेपत्ता छन् । स्थानीय सञ्चारमाध्यमले सार्वजनिक गरेका दृश्यअनुसार सोमबार अग्निनियन्त्रकहरूले ठूलो प्रहरी सुरक्षाबीच क्षतिग्रस्त भवनका भग्नावशेष हटाउने काम गरिरहेका थिए ।

स्वास्थ्यमन्त्री मार्सेला फ्लोरेसका अनुसार विस्फोटमा घाइते भएका ८४ जनामध्ये ३१ जना अझै अस्पतालमा उपचाररत छन् ।

सेनाका कमान्डर हेक्टर अलार्कोनका अनुसार उक्त ब्यारेकमा करिब २४० सैनिक रहेका थिए । तर दुर्घटनाका बेला अधिकांश सैनिक शिविरबाहिर विभिन्न गतिविधिमा संलग्न रहेकाले ठूलो मानवीय क्षति हुनबाट जोगिएको बताइएको छ ।

विस्फोटस्थलको निरीक्षण गरेका राष्ट्रपति रोड्रिगो पाजले थप विस्फोटको जोखिम निम्त्याउन सक्ने सबै विस्फोटक पदार्थ सुरक्षित स्थानमा सारिसकिएको सोमबार पुष्टि गर्नुभयो ।

सरकारले घटनाको जिम्मेवारी निर्धारण गर्न तथा शिविरमा भण्डारण गरिएका विस्फोटक पदार्थको वास्तविक परिमाण पत्ता लगाउन आन्तरिक अनुसन्धानसमेत सुरु गरेको छ । भण्डारण गरिएका केही विस्फोटक पदार्थ जफत गरिएका पटाका रहेको बताइएको छ ।