काठमाडौं- बिनाकसुर ४० वर्षसम्म भारतीय जेलमा थुनिएका इलामका दुर्गाप्रसाद तिम्सिना आइतबार अपराह्न जन्मघर पुगेका छन्।
८६ वर्षकी आमा धनमाया उनकै बाटो हेरिरहेकी थिइन्। भाइहरूको सहयोगमा घर पुगेका उनी आमालाई देख्दा पनि केही बोल्न सकेनन्।
निकै डराएजस्तो देखिएका उनलाई भाइहरूले कर गरेपछि आमा धनमायालाई ‘आमा’ भनी बोलाए।
उनले थप संवाद नगरेपछि धनमायाले रेल र मोटर चढेर आएका कारण छोरा नबोलेको अथ्र्याइन्। र, भोलिदेखि बोल्ने आशा गरिन्।
रित्तो हात जेलबाट छुटेका उनले आमाका लागि मिठाइ ल्याइदिएका थिए। र, चार दशकपछि भेटेकी आमालाई त्यही मिठाइ कोसेली दिए।
‘छोरो साह्रै दुब्लाएछ,’ ८६ वर्षीया धनमायाले मातृवात्सल्य प्रकट गरिन्, ‘हलो जोत्दाजोत्दै देश गएर कमाएर ल्याउँछु भनेको थियो, हराएको हरायै भयो। आउँछ भनेर बाटो हेरिरहेकी थिएँ, बल्ल आयो, खुशी लाग्यो।’
कोलकातास्थित दमदम जेलबाट शनिबार रिहा भएका दुर्गाप्रसाद बसबाट आइतबार बिहान झापा काँकडभिट्टा आइपुगेका थिए। र, आइतबार अपरान्ह इलामस्थित घर पुगेका हुन्।
