काठमाडौं- नाबालिका बलात्कार आरोप लागेका नेपाली राष्ट्रिय क्रिकेट टोलीका पूर्वकप्तान सन्दीप लामिछाने त्रिभुवन अन्तर्राष्ट्रिय विमानस्थलबाट पक्राउ परेका छन्।

कतार एयरवेजको विमानबाट बिहीबार बिहान त्रिभुवन अन्तर्राष्ट्रिय विमानस्थलमा ओर्लिएलगत्तै उनलाई पक्राउ गरिएको प्रहरीले जनाएको छ।

आफू बिहीबार स्वदेश फर्किन लागेको जानकारी लामिछानेले सामाजिक सञ्जालमार्फत् दिएका थिए। विमानस्थलमा बिहान १० बजे नै ओर्लिने भने पनि खराब मौसमका कारण विमान अवतरण गर्न नसक्दा केहीबेर ढिलाइ भएको थियो। दोहाबाट काठमाडौं आएको उनी सवार कतार एयरवेजको विमानले केहीबेर आकाशमा फन्को मारेको थियो।