नयाँदिल्ली- भारतमा शनिबारदेखि फाइभ-जी मोबाइल सेवा शुरु भएको छ।

प्रधानमन्त्री नरेन्द्र मोदीले फाइभ-जी नेटवर्कको सेवा शुरु गराएका छन्। त्यससँगै भारतका आठ शहरमा फाइभ-जी सेवा शुरु भएको छ। सन् २०२३ मा भारतभर फाइभ-जी सेवा थाल्ने भारत सरकारको योजना छ।

यसबाट अल्ट्रा हाइस्पिड इन्टरनेट पनि शुरु भएको छ। उदघाटन समारोहमा एयरटेलका अध्यक्ष सुनिल मित्तलले आफ्नो कम्पनीले फाइभ-जी शुरु गरेको बताए।

दिल्ली, मुम्बई, बैंगलोर, वाराणसीलगायत शहरमा यो सेवा शुरु भएको छ। मार्च २०२३ सम्ममा भारतका कुना-कुनामा फाइभ-जी सेवा विस्तार हुने एयरटेलको भनाइ छ। अन्य कम्पनीले पनि डिसेम्बर २०२३ भित्रमा भारतभर फाइभ-जी नेटवर्क विस्तार गर्ने घोषणा गरेका छन्।