काठमाडौं- कास्कीस्थित मर्दी हिमाल र त्यहाँसम्म पुग्ने ट्रेकिङ रुट देशभर चिनाउने अभियन्ता सुदीप गौतमको भीरबाट लडेर निधन भएको छ।

मर्दी पदयात्रामा पर्ने हाइक्याम्प नजिक शुक्रबार साँझ पानीको पाइप मर्मत गर्न जाने क्रममा पर्यटन व्यवसायी गौतम भीरबाट खसेका थिए। ३५ वर्षीय उनको घटनास्थलमै मृत्यु भएको हो।

गौतमले हाइक्याम्पमै होटल सञ्चालन गर्दै आएका थिए। पानीको पाइप मर्मत गर्दै गर्दा उनी करिब ५० मिटर तल खसेका थिए। उनको टाउकोमा गम्भीर चोट लागेको थियो।

गौतम मर्दी हिमाल पर्यटन पदमार्ग व्यवस्थापन समितिका संस्थापक अध्यक्ष हुन्। यस्तै, अन्नपूर्ण पर्वतारोहण संघको गण्डकी सचिव पनि हुन्।