काठमाडौं- चाडपर्वको समयमा यात्रुहरूबाट तोकिएको भन्दा बढी भाडा लिन खोज्ने १६ जनालाई काठमाडौं कोटेश्वर र नयाँबसपार्कबाट ट्राफिक प्रहरीले पक्राउ गरेको छ।
पक्राउ परेकामाथि कारवाही चलाउन आठजनालाई प्रहरी प्रभाग कोटेश्वर र आठजनालाई प्रहरी प्रभाग गोंगबूको जिम्मा लगाइएको छ।
उपत्यका ट्राफिक प्रहरी कार्यालय रामशाहपथको टोलीले काटेश्वरबाट ८ जना र नयाँबसपार्कबाट ८ जनालाई पक्राउ गरेको हो। चाडपर्वको समयमा यात्रीलाई अनावश्यक हैरानी दिने, तोकिएभन्दा बढी भाडा लिने, टिकटमा तोकिएको सिट नदिनेजस्ता गतिविधिमा संलग्न व्यक्तिहरू माथि प्रहरीले पक्राउ गर्दै कारवाही अगाडि बढाएको छ।
यस्तै, काठमाडौंको बौद्ध नारायणटारमा बिहीबार गरिएको विशेष यान्त्रिक जाँचका क्रममा अवस्था ठीक नभएका बस, टेम्पो, माइक्रो बस, डीआई गाडीलगायत ३५ वटा सवारी साधनलाई ट्राफिक प्रहरीले कारवाही गरेको छ। तीमध्ये ३१ वटालाई नियन्त्रणमा लिएको छ।