काठमाडौँ । फुटपाथ व्यापारलाई दसैंको सन्दर्भसँग जोडेर समाचार प्रकाशन प्रसारण भएसँगै काठमाडौँ महानगरका मेयर बालेन शाहले ध्यानाकर्षण गराएका छन् । उनले फुटपाथमा पैदलयात्रीको पहिलो अधिकार हुने भन्दै ध्यानाकर्षण गराएका हुन् ।
उनले फुटपाथलाई स्थापित गराउन महानगरले आफ्ना नीति तथा कार्यक्रम गरेको बताए । सहरको विकास, सुधार र समृद्धिका लागि कानुन प्रदत्त अधिकार कार्यान्वयन गरेर नागरिक जीवनमा सुधारको महसुस गराउने आफूहरूको प्रतिबद्धता रहेको मेयर शाहले जनाएका छन् ।
‘आर्थिक वर्ष २०७९-०८० को वार्षिक नीतिअन्तर्गत पूर्वाधार विकाससम्बन्धी नीतिमा ‘पैदल यात्री सहज आवागमनका लागि फुटपाथको उपयोग सहज र सरल बनाइने छ, फुटपाथमा मानव आवत जावतबाहेकका सबै क्रियाकलापलाई निषेध गरिनेछ’ भन्ने व्यवस्था गरिएको छ,’ उनले भने ।
उनले आफूहरूले सडक किनारामा निर्वाध हिड्ने अधिकार स्थापित गराउन चाहेको बताउँदै भने, ‘सडक किनारामा निर्बाध हिँड्न पाउने पैदल यात्रीको अधिकार स्थापित गराउन महानगरले आफ्ना क्रियाकलाप आंशिक रुपमा होइन पूर्ण र दीर्घकालीन रुपमा सञ्चालन गर्ने छ, यो कार्यक्रम पर्व विशेष वा अन्य कारण विशेष स्थगित हुने वा लचिलो नहुने कुरा समेत स्पष्ट पार्न चाहन्छौँ ।’