भरतपुर- राष्ट्रिय स्वतन्त्र पार्टीका सभापति रवि लामिछाने बुधबार चितवन आउँदैछन्।
उनले माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ निर्वाचित भएको क्षेत्रमा हुने सभालाई सम्बोधन गर्ने कार्यक्रम तय गरिएको छ।
चितवन क्षेत्र नम्बर ३ मा यसपटक पनि प्रचण्ड निर्वाचन लड्ने तयारी गरिसकेका छन्। सोही क्षेत्रअन्तर्गत पर्ने माडी नगरपालिकाको सभालाई बुधबार मध्याह्न लामिछानेले सम्बोधन गर्ने राष्ट्रिय स्वतन्त्र पार्टी चितवनका सभापति धर्मेन्द्र सापकोटाले जानकारी दिए। उनले कार्यक्रममा वृद्धवृद्धालाई सम्मान गर्ने छन्। र, थारू जातिको सांस्कृतिक कार्यक्रमसमेत प्रस्तुत गरिनेछ।
लामिछाने चितवनबाटै चुनाव लड्ने तयारीका साथ आउन लागेको पार्टी स्रोतले जानकारी दिएको छ। लामिछानेले अहिलेसम्म कहाँबाट निर्वाचन लड्ने भन्ने औपचारिक घोषणा गरिसकेका छैनन्। सोही कारण प्रचण्डकै क्षेत्रबाट उनले उम्मेदवार बन्ने घोषणा गर्न सक्ने आकलन छ।