काठमाडौँ । म्यादी प्रहरीको आवेदन खुलेसँगै एक लाख ३८ हजार ४५२ जना साधारण लेखपढ गर्नेले आवेदन दिएका छन् । यसैगरी २२ हजार ३८६ जना प्लस टु उत्तीर्ण गरेका छन् भने ७१ हजार ९६२ जना एसएलसी उत्तीर्ण र ३११ जनामात्रै स्नातक उत्तीर्ण रहेको प्रहरी प्रधान कार्यालयले जनाएको छ ।
आगामी मंसिर ४ गते प्रतिनिधिसभा र प्रदेशसभा निर्वाचन हुने भएसँगै नेपाल प्रहरीले म्यादी प्रहरीका लागि दरखास्त आह्वान गरेको थियो । जसमा दुई लाख ३३ हजार १०९ जनाले आवेदन दिएका छन् । यसमध्ये एक लाख १५ हजार छनोट हुने छन् ।
आवेदकको उमेरअनुसार २० वर्षसम्मका ७० हजार ९३८, २०–३० वर्षका एक लाख १५ हजार ३११ जना, ३०–४० वर्षका ३४ हजार ३३ र ४०–५४ वर्षका १२ हजार ६२७ जना रहेका छन् ।
म्यादी प्रहरी भर्ना हुन असोज ६ गतेसम्म आवेदनको समय तोकिएको थियो । असोज १४ सम्म छनोट गर्ने, असोज २५ गते अन्तिम नतिजा प्रकाशन गर्ने र असोज ३० देखि कात्तिक ८ गतेसम्म तालिम सञ्चालन हुने प्रहरीले जनाएको छ ।
४० दिनका लागि भर्ना हुने म्यादी प्रहरीले तलब भत्ताबापत ३४ हजार ७६० रुपैयाँ प्राप्त गर्ने छन् । यस्तै खाद्यान्नबापत सात हजार २००, पोशाक खर्चबापत ६ हजार र यातायात खर्चबापत एक हजार रुपैयाँ पाउने प्रहरी प्रधान कार्यालयले जनाएको छ ।