बागलुङ । चाँडो चिकित्सक भेट्न पाइएला भनेर बागलुङ नगरपालिका १२ का टुकबहादुर नेपाली आइतबार बिहान ९ बजे धवलागिरि अस्पताल पुगे । पेटको पत्थरीले दुःख दिएपछि उपचारमा गएका नेपालीले अस्पतालमा भने उल्टो सास्ती खेपे ।
दुई घण्टा लाममा उभिएपछि बल्लतल्ल पाएको बहिरङ्ग सेवाको टिकट लिएर उनी जनरल सर्जन कहाँ पुगे । स्वास्थ्य जाँच र परामर्शपछि चिकित्सकले नेपालीलाई भिडियो एक्सरेका लागि सिफारिस गरिदिए ।
भिडियो एक्सरेका लागि बिल बनाउन नेपाली फेरि टिकट कक्षमै गएर लाममा उभिए । ठेलमठेल भीडमा घण्टौ उभिएपछि उनले पालो त पाए, तर ‘आज भिडियो एक्सरे हुँदैन’ भन्दै कर्मचारीले झ्यालबाटै फर्काइदिए । भिडियो एक्सरेलाई तोकिएको दैनिक ५० जनाको कोटा सकिएको भन्दै कर्मचारीले बिल काट्न नमानेको नेपालीले बताउँछन् ।
“यो कुरा हामीलाई पहिले भनिएन, पछि एक्कासी आज भिडियो एक्सरे हुँदैन भनेर फर्काए”, उनले भने, “बर्सातको बेला महँगो भाडा तिरेर गाउँदेखि आइएको छ, उपचार नगराई कसरी फर्कनु, बजारमा बस्नलाई पैसा छैन ।”
चिकित्सकले सिफारिस लेखेर पठाएपछि भिडियो एक्सरे हुँदैन भनेर बिरामीलाई फर्काउनु अस्पतालको लापरबाही भएको नेपालीको भनाइ छ । उनीसँगै लाममा उभिएकी बागलुङ १ की लीला कार्की पनि अस्पतालको अव्यवस्था देखेर बेचैन देखिएकी थिइन् । टोकन लिँदा, टिकट बनाउँदा, चिकित्सक कुर्दा, बिल बनाउँदा र औषधि लिँदा ठूलो झण्झट बेहोर्नु परेको उनले बताइन् ।
“दुई घण्टा भयो टिकट पाइएको छैन, डाक्टर भेटिने कहिले हो, उपचार पाउने कहिले ?” कार्कीले भने । कार्की स्त्रीरोग विशेषज्ञसँग स्वास्थ्य जाँच गराउन अस्पताल पुगेकी थिइन् । टिकट कक्षका कर्मचारीले पनि सेवालाई छिटोछरितो बनाउन नसकेकामा उनको गुनासो छ ।
उपचारका लागि घण्टौ लाम लागेका अरु बिरामी र उनीहरुका आफन्त पनि अस्पतालको सेवा प्रवाहप्रति असन्तुष्ट देखिन्थे । अस्पताल व्यवस्थापनले बिरामीको समस्यालाई अनदेखा गरिरहेको उनीहरुको गुनासो थियो । अस्पतालको रेडियोलोजी विभागका सहयोगी स्वास्थ्यकर्मी अजिता पन्तले दिनमा ५० जना बिरामीको मात्र भिडियो एक्सरे हुने गरेको जानकारी दिए ।
“५० जनाभन्दा बढी बिरामी हेर्न डाक्टरले पनि भ्याउनु हुँदैन, पहिले टिकट काटेर पछि फर्काएको विषय हामीलाई थाहा भएन, त्यसको व्यवस्थापन टिकट कक्षबाटै हुनुपर्ने हो,” उनले भने । अस्पतालमा रेडियोलोजिष्टका रूपमा डा प्रशुन घिमिरे कार्यरत छन् । उक्त विभागमा जनशक्ति कम भएकाले पनि बिरामीको चाप थेग्नै धौधौ छ।
अस्पतालका मेडिकल सुपरिटेण्डेन्ट शैलेन्द्र विक पोखरेलले आइतबार यसै पनि बिरामीको चाप बढी हुने हुँदा व्यवस्थापनमा केही अपुग भएको बताए । “जनशक्ति अभावको पुरानै समस्या छ, हामीले यो विषय पटकपटक सम्बन्धित पक्षसम्म पुर्याएका छौँ, तर सुनुवाइ हुनसकेको छैन,” उनले भने ।
टिकट कक्षमा हुने भीड र लाममा उभिनुपर्ने स्थितिको अन्त्यका लागि प्रविधिमा पोख्त र चुस्त जनशक्तिको प्रबन्ध गर्न लागिएको मेसु पोखरेलले बताए । उनले गण्डकी प्रदेश सरकारले दिएको नयाँ सफ्टवेयरमा अभ्यस्त हुन कर्मचारीलाई समय लागेकाले पनि सेवा प्रवाह छरितो हुन नसकेको बताए ।
“काउण्टरलाई सुधार गर्न योजना बनाएका छौँ, अब अहिलेको समस्या हट्छ, रेडियोलोजी विभागमा पनि जनशक्ति थप्नुपर्ने अवस्था छ, बिरामीको चाप यस्तै रूपमा बढ्दै जाने हो भने एकजना मात्र रेडियोलोजिष्टले भ्याउनै सक्दैन”, उनले भने, “अस्पतालप्रति जनविश्वास बढेर नै बिरामीको चाप बढेको हो, हामी सेवालाई अझ प्रभावकारी बनाउनतिर लाग्छौँ, भएका कमीलाई सुधार्छौं ।”
उपप्रादेशिक तहको यस अस्पतालमा १६ विशेषज्ञ चिकित्सक र छ जना मेडिकल अधिकृतको दरबन्दी छ। ११ विशेषज्ञ र ४ मेडिकल अधिकृत मात्र अस्पतालमा कार्यरत छन्। तीमध्ये पनि अधिकांश छात्रवृत्ति करारका चिकित्सक छन्।