कैलाली। इस्लाम धर्मका पैगम्बर हजरत मोहम्मद (सल्लल्लाहु अलैहि वसल्लम) को जन्मदिनको सम्झनामा मनाइने मोहम्मद डे को अवसरमा धनगढीमा रक्तदान कार्यक्रम आयोजना गरिएको छ । धर्मको सन्देशलाई मानव सेवासँग जोड्दै नेपाल नुरी जामा मस्जिद र गौसिया मस्जिदको आयोजनामा धनगढीको पृथ्वी नारायण चोक (धनगढी चौराहा) मा रक्तदान कार्यक्रम सम्पन्न भएको हो ।
रक्तदान कार्यक्रमअघि विभिन्न धार्मिक तथा सामाजिक सन्देशसहित नगर परिक्रमासमेत गरिएको थियो । नगर परिक्रमापछि आयोजित रक्तदान कार्यक्रममा ४० पिन्ट रगत संकलन भएको नेपाल नुरी जामा मस्जिदका अध्यक्ष डा. मेराज आलम अन्सारीले जानकारी दिए ।
अध्यक्ष अन्सारीले पैगम्बर हजरत मोहम्मदले मानवता, प्रेम, भाइचारा, सहयोग र सेवाको सन्देश दिएको उल्लेख गर्दै रक्तदानजस्तो मानवीय कार्यमार्फत त्यही सन्देशलाई व्यवहारमा उतार्ने प्रयास गरिएको बताए । उनका अनुसार, “रगतको कुनै धर्म हुँदैन । हामीले दिएको रगतले जुनसुकै धर्म, जात वा समुदायका बिरामीको ज्यान बचाउन सक्छ । त्यसैले मानव सेवाभन्दा ठूलो धर्म अरू हुन सक्दैन ।”
यस्तै, कार्यक्रममा सुदूरपश्चिम प्रदेशका रक्तदान सद्भावना दूत एवं सर्वाधिक सतक रक्तदाता दीपक उपाध्यायको समेत उपस्थिति रहेको थियो । उपाध्यायले धार्मिक पर्वलाई केवल धार्मिक गतिविधिमा सीमित नराखी मानव सेवासँग जोड्नु सकारात्मक उदाहरण भएको बताए ।
उनले भने, “मोहम्मद डे को अवसरमा आयोजना गरिएको रक्तदानले धर्मभन्दा माथि उठेर मानवताको सेवा गर्न सकिन्छ भन्ने सन्देश दिएको छ । हामीले दिएको केही मिनेटको समय र केही थोपा रगतले कसैको जीवनमा नयाँ आशा थप्न सक्छ । रक्तदान नै जीवनदान हो, त्यसैले हरेक स्वस्थ नागरिकले नियमित रक्तदान गर्न प्रेरित हुनुपर्छ ।”
उपाध्यायले विभिन्न धर्म, समुदाय र संस्थाले आफ्ना विशेष अवसरलाई रक्तदान तथा अन्य मानवीय सेवासँग जोड्दै अघि बढेमा समाजमा आपसी सद्भाव, भाइचारा र मानवताको भावना अझ बलियो बन्ने बताए ।
नेपाल रेडक्रस सोसाइटी प्रादेशिक रक्तसञ्चार सेवा केन्द्रको प्राविधिक सहयोगमा सम्पन्न रक्तदान कार्यक्रममा स्थानीय नागरिक तथा युवाहरूको सहभागिता रहेको थियो । कार्यक्रमबाट संकलित रगतले उपचारका क्रममा रगत आवश्यक पर्ने बिरामीलाई सहयोग पुग्ने आयोजकले जनाएको छ ।
धार्मिक आस्था र मानव सेवाको सुन्दर संगमका रूपमा सम्पन्न कार्यक्रमले “रगतको कुनै धर्म हुँदैन, मानवताको एउटै धर्म हुन्छ” भन्ने सन्देशसमेत दिएको छ ।
