काठमाडौं- आज २६ अगस्ट। विश्व इतिहासका असंख्य घटनाले आजको दिनलाई संसारभर सम्झना दिलाउँछन्। प्रस्तुत छ, आजको दिन भएका केही विश्व चर्चित घटनाको सारसंक्षेप।
– सन् १७६८- अस्ट्रेलिया पुग्ने पहिलो युरोपेली
सन् १७६८ मा आजकै दिन ब्रिटिस अन्वेषक जेम्स कुक अस्ट्रेलियाको खोजीमा निस्केका थिए। अप्रिल १९७० मा अस्ट्रेलियाको पूर्वी भेगमा पाइला टेकेर उनले त्यहाँ पुग्ने पहिलो युरोपेली नागरिकको रेकर्ड राखेका थिए। उनी १२ जुलाई १७७१ मा युरोप फर्केका थिए।
– सन् १८८३- इन्डोनेसियन ज्वालामुखीले लियो ३६ हजारको ज्यान
१४३ वर्षअघि सन् १८८३ मा आजकै दिन इन्डोनेसियामा विष्फोट भएको ज्वालामुखीले ३६ हजारजनाको ज्यान लिएको थियो। त्यसलाई ‘भोल्क्यानो क्राकाटोवा’ नाम दिएको थियो। ज्वालामुखी विष्फोटपछि आएको सुनामीले पनि जनधनको व्यापक क्षति गरेको थियो।
– सन् १९७८- अन्तरिक्षमा पुग्न पहिलो जर्मन
तत्कालीन पूर्वी जर्मनीका एयर फोर्स पाइलट सिग्मन्ड जानले सन् १९७८ मा पहिलोपटक अन्तरिक्षमा पुग्ने जर्मन नागरिकको रेकर्ड राखेका थिए। तत्कालीन सोभियत संघको मानवयुक्त ‘सोयुज ३१’ यानमा उनी अन्तरिक्षमा पुगेका थिए।
– सन् २०१९- डुब्दै गएको जाकार्ताबाट राजधानी सार्ने इन्डोनेसियाको प्रस्ताव
जलवायु परिवर्तनको असरका रूपमा अत्यधिक जनघनत्व रहेको जाकार्ताबाट राजधानी अन्यत्र सार्ने प्रस्ताव त्यहाँका राष्ट्रपति जोको विडोडोले अगाडि सारेका थिए। कालिमान्टानस्थित आइल्यान्ड अफ बोर्नियोमा राजधानी सार्न उनले प्रस्ताव गरेका थिए। केही वर्षभित्रै बोर्नियोमा राजधानी सार्न इन्डोनेसिया सरकार लागिपरेको छ।
– सन् २०२०- अफगान बाढीले लियो १०० को ज्यान
सन् २०२० मा आजकै दिन अफगानिस्तानमा आएको बाढीले कम्तिमा १०० जनाको ज्यान लिएको थियो। चारिकार नामक शहरमा आएको उक्त बाढीमा परी ५०० घर ध्वस्त भएका थिए।
– सन् २०२१- अफगानी विष्फोटमा गयो ७३ को ज्यान
सन् २०२१ मा आजकै दिन अफगानिस्तानको काबुल विमानस्थलमा भएको आत्मघाति बम विष्फोटमा ७३ जनाले ज्यान गुमाएका थिए। मारिनेमा ६० सर्वसाधारण र १३ अमेरिकी सैनिक थिए। अमेरिकी सेना अफगानिस्तानबाट फिर्ता भएपछि तालिबानविरोधी अफगानी नागरिकलाई देशबाहिर निकाल्ने प्रयासकै बीच उक्त आत्मघाति आक्रमण भएको थियो।
– सन् २०२३- अमेरिकामा भेटियो हालसम्मकै लामो गोही
सन् २०२३ मा आजकै दिन अमेरिकाको मिसिसिपीस्थित सनफ्लावर नदीमा हालसम्म रेकर्ड भएको मध्ये सर्वाधिक लामो गोही फेला परेको थियो। उक्त गोही १४ फिट ३ इन्च लामो थियो। र, तौल ३६४ किलो थियो।