काठमाडौँ । एक दिवशीय शृंखलाको पहिलो खेलमा नेपालले जिम्बोवे ‘ए’लाई १३७ रनको लक्ष्य दिएको छ ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको नेपालले ३१.३ ओभरमा १३६ रन बनाउँदै अलआउट भएको हो ।

खराब ब्याटिङ गरेको नेपाली टोली जिम्बावे ए का बलरको बलिङसामु खुलेर खेल्न सकेनन् । नेपालका लागि सोमपाल कामीले सर्वाधिक ३० रन बनाए । उनी छैठौं नम्बरमा ब्याटिङका लागि गएका थिए । ७० बल खेल्दै उनले २ चौका र १ छक्का प्रहार गरेका थिए ।

करण केसीले २५ रन मात्र बनाउँदा ओपनर कुशल भुर्तेलले १९ र दीपेन्द्र सिंह ऐरीले १८ रन बनाए ।

यसअघि तीन खेलको टी–२० शृंखला बराबरमा सकिएको थियो । पहिलो खेलमा जिम्बावे ए विजयी हुँदा दोस्रो खेल वर्षाले रद्ध भएको थियो । तेस्रो खेलमा नेपाल ८ विकेटले विजयी भएको थियो ।