कैलाली- ‘स्वास्थ्यका लागि खेलकुद, राष्ट्रका लागि खेलकुद’ भन्ने मुख्य नाराका साथ चैतन्य तेश्रो सुदुरपश्चिम प्रदेश स्तरीय तेक्वान्दो प्रतियोगिताको आयोजना हुने भएको छ । यहि जेठ १५ गते देखि १७ गतेसम्म पाठशाला परिसरमा आयोजना हुन लागेको चैतन्य तेश्रो सुदुरपश्चिम प्रदेश स्तरीय तेक्वान्दो प्रतियोगिताको तयारी पुरा भएको आज आयोजित पत्रकार सम्मेलनमा जानकारी गराइएको छ ।

पत्रकार सम्मेलनमा बोल्दै पाठशालाका निर्देशक कटक बहादुर सिंहले नगर, जिल्ला हुदै अहिले तेश्रो संस्करणमा आइपुग्दा प्रदेशस्तरीय तेक्वान्दो प्रतियोगिता आयोजना गर्न गैरहेको बताउदै प्रतियोगिताले नया खेलाडी उत्पादन र भएका खेलाडीहरुको मनोवल उच्च राख्ने बताए । प्रतियोगिताहरु नभै रहेको अवस्थामा आफुमा भएको क्षमता समेत प्रदर्शन गर्नबाट बंचित खेलाडीहरुलाई यो प्रतियोगिताले अवसर प्रदान गरेको सिंहले बताए । सिंहले तेक्वान्दो तेश्रो डान ब्ल्याक बेल्ट प्राप्त गरिसकेका छन ।

प्रतियोगिताको ओलम्पियन दीपक बिष्टले उदघाटन गर्ने तय भएको पाठशालाका अध्यक्ष गणेश जोशीले बताए । पाठशाले आयोजना गर्न लागेको प्रदेश स्तरको तेक्वान्दो प्रतियोगिता पहिलो भएको बताउदै अध्यक्ष जोशीले प्रतियोगिता डिजिटल फर्म्याटमा आयोजना गर्न लागेको बताए ।

७ लाख ५० हजार रुपैया लागत लाग्ने अनुमान गरिएको प्रतियोगितामा प्रथम हुने टिमले ५० हजार, दोश्रो हुनेले ३० हजार र तेश्रो हुनेले २० हजार नगद, ट्रफी र प्रमाणपत्र प्राप्त गर्ने अध्यक्ष जोशीले बताए । उनले प्रतियोगितामा उत्कृष्ट प्रदर्शन गर्ने महिला तथा पुरुष खेलाडीले जनही ५/५ हजार नगद प्राप्त गर्ने बताए ।

त्यस्तै पत्रकार सम्मेलनमै बाह्रसिंगेको आकृती भएको मस्कटको समेत अनावरण गरिएको छ ।