भारतको राजधानी दिल्लीमा यो साता कोभिड-१९ को ‘आर भ्यालु’ २.१ रेकर्ड भएको छ। त्यसको अर्थ हो, हरेक संक्रमितले थप दुईजनालाई कोरोना सारिरहेका छन्। यो विश्लेषण आईआईटी मद्रासका अनुसन्धानकर्ताहरूले गरेका हुन्।

‘आर भ्यालु’ १ अंकभन्दा तल झरेपछि मात्र महामारी अन्त्यको दिशामा रहेको संकेत पाइन्छ। डिपार्टमेन्ट अफ म्याथमेटिक्स र सेन्टर फर एक्सेलेन्स फर कम्प्युटेसनल म्याथमेटिक्स एन्ड डाटा साइन्सको यो अध्ययनको नेतृत्व प्राध्यापक निलेश एस उपाध्ये र प्राध्यापक एस सुन्दरले गरेका थिए।

अनुसन्धानकर्मीहरूले समाचार एजेन्सीले पीटीआईलाई बताएअनुसार भारतभरको आर भ्यालु १.३ मा अडिँदा दिल्लीमा २.१ देखिएको हो। तथापि, अहिले नै दिल्लीमा कोभिड-१९ महामारीको चौथो लहर शुरु भएको आकलन गर्न हतार हुने आईआईटी मद्रासको डिपार्टमेन्ट अफ म्याथमेटिक्सका एसिस्टेन्ट प्रोफेसर डा. जयन्त झाले बताए।

‘हामी अहिले एकजना संक्रमितले थप दुईजनालाई कोरोना भाइरस प्रसार गरिरहेका छन् मात्र भन्न सक्छौँ। केही दिन अझै पर्खिनुपर्छ किनकि इम्युनिटीको अवस्था के छ भन्ने अहिले नै स्पष्ट छैन,’ झाले भने। भारतमा गत जनवरीमा कोभिड-१९ को तेस्रो लहर चलेको थियो।

उनका अनुसार मुम्बई, चेन्नई र कोलकाताजस्ता भारतका प्रमुख शहरहरूमा अहिले अपेक्षित ट्रेन्डभन्दा कम संक्रमित देखिएका छन्। तथापि, दिल्लीमा अपेक्षाभन्दा ज्यादा संक्रमित देखिएका छन्। नयाँ दैनिक संक्रमित एक हजार ४२ जना छँदा दिल्लीमा कोभिड-१९ पजिटिभिटी दर ४.६४ प्रतिशत देखिएको छ। यो २२ अप्रिल शुक्रबारको तथ्यांक हो।