भारत भ्रमणमा रहेका विश्व स्वास्थ्य संगठन (डब्लूएचओ) का महानिर्देशक डा. टेड्रोस अदानम गेब्रेयससले एक परम्परागत दबाई उद्योगको शिलान्यास गरेका छन्।

उनले शिलान्यास गरेको उद्योगमा भारत सरकारले २५ करोड डलर लगानी गर्दैछ। गेब्रेयससले उक्त उद्योगलाई ग्लोबल प्रोजेक्ट संज्ञा दिए। खासगरी, कोरोना महामारीयता पूर्वीय परम्परागत औषधिप्रति पश्चिमा जगतमा चासो बढेको छ। गेब्रेयससको भनाइले पनि त्यसैलाई संकेत गर्छ।

नेपालका प्रधानमन्त्री शेरबहादुर देउवाले पनि उक्त उद्योग शिलान्यास समारोहलाई भर्चुअल सम्बोधन गरेका थिए। उनले पनि परम्परागत दबाइबाट मानव स्वास्थ्यको रक्षाका लागि ठूलो उपलब्धी हासिल गर्न सकिने बताएका थिए। प्रधानमन्त्री देउवाले यस विशाल परियोजनाका लागि डब्लूएचओ र भारत सरकारलाई बधाइ दिए। अनि नेपाल र भारतमा परम्परागत दबाइ उत्पादनको प्रचुर सम्भावना औंल्याए।

‘ग्लोबल सेन्टर फर ट्रेडिसनल मेडिसिन संयोग होइन। मेरा भारतीय शिक्षकहरूले मलाई परम्परागत दबाइहरूका बारेमा निकै राम्रोसँग बताएका छन्,’ डा. गेब्रेयससले भने, ‘म उनीहरू प्रति आभारी छु। मैले भारतमा परम्परागत दबाइहरूका बारेमा धेरै सिक्ने मौका पाएको छु।’

उनले यस विश्वव्यापी परियोजनामा २५ करोड डलर लगानी गर्न लागेमा भारतीय प्रधानमन्त्री नरेन्द्र मोदीको सराहना गरे। बंगलादेशकी प्रधानमन्त्री शेख हसिना वाजेदले परम्परागत चिकित्साको उक्त केन्द्र प्रमाणमा आधारित अनुसन्धान तथा परम्परागत चिकित्सा मानकका लागि अन्तर्राष्ट्रिय केन्द्र बन्ने विश्वास व्यक्त गरिन्।

मौरिससका प्रधानमन्त्री कुमार जगन्नाथले पनि समारोहलाई भर्चुअल सम्बोधन गरेका थिए। नोभेम्बर २०२० मा उक्त उद्योग निर्माणको घोषणा गरिएको थियो। भारतले त्यसका लागि २५ करोड डलर खर्चिँदै छ।