नयाँदिल्ली- दिवार, अमर अकबर एन्थोनी, सुहाग, काला पत्थर, द बर्निङ ट्रेन, शान र कालियाजस्ता चर्चित चलचित्रमा अभिनय गरिसकेकी परविन बाबीको आज ६८औं जन्मोत्सव हो। जुन समय भारतीय अभिनेत्रीहरू साधारण नारीको भूमिकाले चिनिन्थे, त्यही समय परविन आफ्नो बोल्डनेस र पश्चिमी पहिरनले परिचित थिइन्। एक दिन परविन अचानक सिनेमाको सेटबाट हराइन्। उनी हराएपछि उनको सम्बन्ध अन्डर्वर्ल्डसँग हुनसक्ने जानकारी बाहिरिए पनि प्रमाणित भने भएन।

४ अप्रिल १९५४ मा जुनागढ, गुजरातमा परविन बाबीको जन्म वली मोहम्मद खानको घरमा भएको थियो। परविनको जन्म उनका आमा–बुवाको विवाह भएको १४ वर्षपछि भएको थियो। उनी पाँच वर्षकी छँदा उनका बुवाको देहासन भएको थियो। अहमदाबादमा पढाइ गरिरहेकी परविनले मोडलिङमा कदम राखिन्। बोल्ड परविन कलेज पढ्दैदेखि चुरोट सेवन गर्थिन्। एक दिन बोल्ड परविनमा बीआर इसारको नजर प¥यो र उनले परविनलाई अभिनेत्री बनाउने अठोट गरे।

परविनलाई सन् १९७३ मा चलचित्र ‘चरित्र’मा अभिनय गर्ने मौका मिल्यो। उक्त चलचित्र धेरै नचले पनि परविनलाई अन्य चलचित्रबाट भने अफर आउन थालिसकेको थियो।

सन् १९८३ मा परविन एक चलचित्रको सुटिङको सेटबाट अचानक बेपत्ता भइन्। कसैलाई केही जानकारी नदिई परविन हराउँदा अन्डर्वर्ल्डले उनलाई अपहरण गरेको समाचारहरू बाहिरिए। उनका धेरै चलचित्र उनको अनुपस्थितिमै रिलिज भए। ६ वर्षपछि परविन मुम्बई आइन् र आफू अचानक हराउनुको कारण आध्यात्मिक बाटो रोज्नु रहेको बताइन्।

दुःखमा एक्लै

परविनलाई सिजोफ्रेनिया नामक मानसिक रोग लाग्यो। उनको मानसिक अवस्था विस्तारै बिग्रँदै गइरहेको थियो। उनको उपचारका लागि देश–विदेशका नामी चिकित्सकहाँ धाउँदा पनि कुनै हल निस्किएन।

मानसिक स्वास्थ्यका कारण परविनले धेरै कष्टदायी जीवन बिताउनुपरेको थियो। सन् १९८४ मा परविनलाई न्युयोर्क एयरपोर्टमा प्रहरीले पक्राउ गरेर मानसिक अस्पतालमा राखेका थिए। परविन एयरपोर्टमा असामान्य व्यवहार गरिरहेकी थिइन्, जसकारण उनीसँग सोधपुछ गर्दा उनले आफ्नो परिचय दिन सकेकी थिइनन्। त्यसपछि उनलाई हथकडी लगाएर मानसिक अस्पताल पुर्‍याइएको थियो। अवस्थाबारे जानकारी पाउनेबित्तिकै इन्डियन काउन्सिल परविनकहाँ पुग्दा उनी केही नभएजसरी हाँसीरहेकी थिइन्।

परविनको असामान्य व्यवहार देखेर उनीसँग आफन्त, साथीभाइ सबै टाढा भएका थिए। परविन मुम्बईस्थित पेन्टहाउसमा एक्लै बस्न थालेकी थिइन्। उनले मानिससँग घुलमिल हुन पूर्णतया बन्द गरेकी थिइन्।

केही दिनदेखि उनको घरबाहिर दूधका प्याकेट र पत्रपत्रिका जम्मा भएको देखेर २२ जनवरी २००५ मा परविनका छिमेकीले प्रहरीलाई बोलाए। प्रहरीले ढोका तोडेर भित्र जाँदा परविन मृत भेटिइन्। पोस्टमार्टम गर्दा परविनले धेरै दिनदेखि खाना नखाएको पुष्टि भएको थियो।