काठमाडौं- यहि साउन ३२ गतेबाट दर्शकमाझ प्रदर्शनमा आउन लागेको फिल्म ‘बुलाकी’ को विभिन्न देशको प्रदर्शन अधिकार बिक्री भएको छ । फिल्मको यु.के, समग्र यूरोप र अष्ट्रेलियाको प्रदर्शन अधिकार एकसाथ बिक्री भएको निर्माण पक्षले जानकारी दिएको छ ।
फिल्मलाई नेपालसँगै एकसाथ विश्व बजारमा प्रदर्शन गर्नेगरी फिल्म वितरण तथा मनोरञ्जनात्मक गतिविधिमा क्रियाशील कम्पनी वि।एस। इन्टरटेन्मेन्टले खरिद गरेको निर्माता तथा अभिनेता विराज बिष्टले बताए । ‘बुलाकी’ निर्माण कम्पनी छत्रेश्वरी म्यानेजमेन्ट प्राली र विएस इन्टरटेन्मेन्टबिच फिल्म वितरणका बिषयमा सम्झौता भएको निर्माता विष्टले बताए ।
नेपालको वास्तविक र मौलिक कथालाई विश्वभर छरिएर रहेका नेपाली फिल्मका दर्शकमाझ साझा गर्न पाउनुलाई महत्वपूर्ण उपलब्धि रहेको बताए । अन्य देशहरूमा पनि फिल्म प्रदर्शनको कुरा अघि बढेको निर्माता तथा नायक बिष्टले बताए ।
लक्ष्मण सुनारको निर्देशनमा बनेको फिल्ममा सुरक्षा पन्त, विराज विष्ट, नरेन खड्का, सरस्वती खत्री, लक्ष्मी गिरी, रमेश बुढाथोकी, सुशील पोखरेल लगायत प्रमुख अभिनयमा छन् ।