कैलाली- स्थानीय र विभिन्न संघसंस्था लगायत धार्मिक संघसंस्थाको बिरोधपछी कैलालीको धनगढी उपमहानगरपालिका वडा नम्बर ७ मनेहरामा अस्पताल भन्दै चर्च चलाउने लेट मेइन धनगढी र नेपाल लाइफ वर्ड मिसनले बनाएको भवन भत्काइएको छ ।
नक्सा पास नगरी भवन बनाइएको पाइएपछि आज भत्काइको उपमहानगरपालिकाका डिभिजनल इन्जिनियर दिजराज भट्टले बताए । उनले उपमहानगरपालिकाबाट नक्सा पास नै नगरी भवन बनाएको पाइएपछि भत्काइएको बताए ।
यसअघि उपमहानगरपालिका वडा नम्बर ७ को कार्यालयले लेट मेइन धनगढी प्रालि र नेपाल लाइफ वर्ड मिसनको दर्ता खारेजी गरेको थियो ।
लेट मेइन धनगढी प्रालिले २०८० साउन २२ गते वडा कार्यालयमा सिपमूलक तालिम तथा परामर्श सेवा सञ्चालन गर्ने प्रयोजन राखी वडा कार्यालयमा व्यवसाय दर्ता गराएको हो। यस्तै, नेपाल लाइफ वर्ड मिसनले २०८१ बैशाख १६ गते सेमिनार, तालिम आदि सञ्चालन गर्ने प्रयोजनका लागि वडामा व्यवसाय दर्ता गराएको हो।
धनगढी-५ का प्रभाकर भण्डारीबाट साढे चार कट्ठा जग्गा १५ वर्षका लागि लिजमा लिएर लेट मेइन धनगढी प्रालिले चर्च निर्माण गरेको हो। सो जग्गामा दुई करोडको लागतमा दुई तले चर्च निर्माण गरिएको थियो। त्यसपछि नेपाल लाइफ वर्ड मिसन नामक मसिनरीले सो भवनमा धनगढी मण्डली चलाउन थालेको हो।
