दर्शन शाह अमेरिकाको हवाई फोर्समा कार्यरत भारतीय मुलका अमेरिकी नागरिक हुन्। उनी अहिले लामो प्रयासपछि ड्युटीको समयमा तिलक लगाउने छुट पाएकाले समाचारमा छाएका छन्।

दर्शन कार्यरत ‘फ्रान्सिस ई. वारेन एयर फोर्स बेस’ले एक प्रेस नोट जारी गर्दै उनलाई युनिफर्मसँगै तिलक लगाउने छुट दिएको बताएको छ। हिन्दू परिवारमा जन्मिएका शाहले जुन २०२० मा सेनाको तालिम शुरु गरेदेखि नै धार्मिक आस्थाका कारण तिलक लगाउन छुट पाउनुपर्ने माग गरिरहेका थिए।

तालिमको समयमा तिलक लाउने माग गर्दा उनलाई प्राविधिक शिक्षालयसम्म पर्खन भनिएको थियो। प्राविधिक शिक्षालयमा सो आग्रह पुनः दोहो¥याउँदा फेरि ड्युटी स्टेसनमा तैनाथ नभएसम्म पर्खन भनिएको थियो। दुई वर्षको प्रयासले अहिले उनको माग पूरा भएको हवाई फोर्सले जारी गरेको प्रेस नोटमा उल्लेख छ।

शाह अमेरिकाको वाइओमिङ राज्यस्थित फ्रान्सिस ई. वारेन हवाई फौज आधार शिविरमा एरोस्पेस मेडिकल टेक्निसियन (हवाई क्षेत्रका चिकित्सकीय प्राविधिक) छन्। ‘प्रत्येक दिन तिलक लगाएर काममा जाँदा खुशी लाग्छ। मेरो जितपछि साथीहरूले मलाई बधाइ दिइरहेका छन्। तिलक लगाउने स्वीकृति पाउनका लागि मैले अथक प्रयास गरेको उनीहरूले देखेकाले उनीहरू पनि खुशी छन्।’ तिलक लगाउने अनुमति पाएपछि शाहले बताए।

उनका अनुसार उनले बाल्यकालमा दुई वर्ष हजुरबुवा–हजुरआमासँग बिताएका थिए। उनीहरूकै प्रभावका कारण आफूमा धार्मिक प्रभाव परेको उनले बताए। ‘उहाँहरूले मलाई धर्म, पर्व र परम्पराबारे शिक्षा दिनुभयो। मेरो धर्ममा मात्र होइन, मेरो मातृ भाषा, जुन गुजराती हो, त्यसमा पनि उहाँहरूको सकारात्मक प्रभाव छ,’ शाहले बताए। उनका अनुसार उनले तीन कक्षादेखि तिलक लगाइरहेका छन्।

शाहको भनाइ पनि समेटेर सार्वजनिक गरिएको प्रेस नोटमा उनले निधारमा तिलक चन्दन लगाएपछि मात्र आफ्नो पहिचानले पूर्णता पाएको महशुस गर्ने उल्लेख छ।

प्रेस नोटमा राखिएको शाहको भनाइमा उनले अमेरिकाले उसका नागरिकलाई धार्मिक विश्वास अभ्यास गर्न छुट दिने कुरालाई पनि जोडेका छन्। ‘अमेरिकी संविधानको पहिलो संशोधनले धार्मिक, अभिव्यक्ति तथा शान्तिपूर्ण भेलाको स्वतन्त्रता नदिएको भए मैले यो सफलता पाउने थिइनँ। यो देशमा कसैलाई उसको विश्वासका आधारमा कारवाही गरिँदैन। यही कुराले नै अमेरिकालाई महान बनाएको छ,’ प्रेस नोट अनुसार शाहले भनेका छन्।