तारागाउँ विकास समितिको तत्कालिन अध्यक्ष हुँदा अनियमितता गरेको आरोप खेपिरहेका नारदकुमार लुइँटेललाई पुनः सोही समितिको सदस्य–सचिव नियुक्त गरिएको खुलेको छ।

संस्कृति, पर्यटन तथा नागरिक उड्डयनमन्त्री प्रेमबहादुर आलेले रिक्त रहेको तारागाउँ विकास समितिको सदस्य सचिवमा लुइँटेललाई २५ फागुनमा नियुक्त गरेका हुन्।

समितिका पूर्वअध्यक्ष लुइँटेलमाथि अधिग्रहण गरिएको जग्गा समिति मातहत ल्याउनुको साटो पुनः फिर्ता गराउने प्रलोभन देखाएर कमिसन लिएको, उक्त जग्गाको फाइल लुकाएकोलगायत आरोप लागेको छ। उनीविरुद्ध परेको उजुरीमाथि छानविन गर्न अख्तियारले २५ माघमा संस्कृति, पर्यटन तथा नागरिक उड्डयन मन्त्रालयमा पत्र पठाएको थियो। यस्तै, २४ माघमा राष्ट्रिय सतर्कता केन्द्रले तारागाउँ विकास समितिले लुइँटेलविरुद्ध लागेको आरोपबारे राय प्रतिक्रिया पठाउन पत्राचार गरेको थियो।

मन्त्रालय आफैंले लुइँटेलविरुद्ध लागेका आरोपबारे राय प्रतिक्रिया पठाउन ११ फागुनमा समितिलाई पत्राचार गरेको थियो। तर, समितिले आफ्नो राय पेश गरेकै दिन २५ फागुनमा मन्त्रालयले नै लुइँटेललाई सदस्य सचिव नियुक्त गरेको थियो। नियुक्ति पत्रमा उनको स्थायी ठेगाना सर्लाही हरिवन नगरपालिका–१० उल्लेख छ।

यस्ता छन् लुइँटेलमाथि आरोप

मन्त्रालयले समितिलाई लेखेको पत्रमा काठमाडौं बौद्धस्थित ३५ रोपनी जग्गामा समितिका तत्कालीन अध्यक्ष लुइँटेलले अधिग्रहण गरिएको जग्गा पुनः फिर्ता गराउने भन्ने अवैध शर्तमा कमिसन लिएको आरोप रहेको उल्लेख छ। यस्तै, प्रतिनिधिसभा अन्तर्राष्ट्रिय सम्बन्ध समितिले तारागाउँको अध्ययन अनुगमनसम्बन्धी प्रतिवेदनमा होटल हायातनजिकको तीन रोपनी १५ आना जग्गा समितिको कार्यालय निर्माण गर्न निर्देशन दिएकोमा उक्त जग्गालाई लुइँटेलको पालामा समितिको सञ्चालक परिषदसमेतको मिलेमतोमा सपिङ कम्प्लेक्स बनाउने डिजाइन भएको आरोप पनि उनीमाथि लागेको छ।

यस्तै, न्युरोडस्थित रमागृहलाई ३० वर्षको अस्वाभाविक अवधि राखेर सम्झौता गरेको, समितिबाट गरिने योजनाको टेन्डरको प्रक्रियामा पनि करार र ज्यालादारी कर्मचारीलाई संलग्न गराई सेटिङ गराउने गरेको आरोप पनि लुइँटेलमाथि लागेको छ।

अख्तियारको पत्रमा न्युरोडस्थित रमा गृहमा रहेको कार्यालय सारेर सो भवन ३० वर्षका लागि ठेक्कामा दिइएको उल्लेख छ। लुइँटेलकै पालामा रमा गृह ३० वर्षका लागि न्यून भाडा दरमा भाडामा दिएको उजुरी परेको पत्रमा उल्लेख छ। लुइँटेलले कार्यालयको भाडाबाट कमिसन लिने गरेको र वार्षिक ९४ लाख रुपैयाँमा चाँगेस्थान सप्लायर्स नामक कम्पनीलाई सेटिङमा दिई कमिसन खाएको आरोप पनि उजुरीमा लगाइएको छ।

तत्कालीन अध्यक्ष लुइँटेलले संस्थाको हितविपरीत हायात होटलमा बसेर बैठक भत्ता बुझ्ने, संस्थाको सेयर घटाउने कार्य गरेको र जग्गा विवाद राख्ने गरेको उजुरीमा उल्लेख छ। यससँगै सेटिङमा टेन्डर गराउने, चार करोड रुपैयाँभन्दा बढी सम्पत्ति जोडेर घर बनाएको, समितिले सञ्चालन गरेका तीनवटा पोखरी, ककनी र नगरकोटका रिसोर्ट पनि उनको पालामा अस्तव्यस्त बनेको उजुरीमा दाबी गरिएको छ।