जनकपुरधाम- अध्यादेशबाट ल्याएको रेल सञ्चालनसम्बन्धी कानून दोस्रोपटक पनि जनकपुर रेल ‘ड्राइ रन’मै सीमित भएको छ। सरकारले रेल सञ्चालनमा गम्भीरता नदेखाएपछि अध्यादेशबाट ल्याएको कानून कागजको पानामै सीमित हुन पुगेको छ।

रेल कानून नै निष्क्रिय भएपछि कुर्था-जयनगर रेलको यात्री सेवा पुनः अनिश्चित हुन पुगेको हो। १ फागुनदेखि जनकपुर रेलको नियमित ड्राइ रन सञ्चालन हुन थालेको थियो। तर, रेल सञ्चालनसम्बन्धी कानून नै निश्क्रिय बन्दा नियमित यात्री सेवा शुरु हुनै नसकेको हो। अहिले ड्राइ रनको समय पनि कटौति गरिएको छ।

कुर्थाबाट जयनगर ओहोरदोहोर गर्न दैनिक एक सय ३० लिटर डिजेल खर्च हुने गरेको छ। तर, यात्रुबिनै रेल चल्ने भएपछि दैनिक खर्च बढेको छ। सोही कारण खर्च कटौति गर्न अब महिनाको १५ दिन मात्र ड्राइ रन गरिने नेपाल रेल्वे कम्पनीका महाप्रबन्धक निरञ्जन झाले जानकारी दिए।

उक्त रेल सञ्चालनका लागि गत माघमा रेलमार्गका विभिन्न पोस्टका लागि ६५ जना कर्मचारी भर्ना गरिएको थियो। तर, रेल सञ्चालनमा नआउँदा उनीहरू काम नगरी तलब लिने कर्मचारीमा रूपान्तरित भएका छन्।

‘प्राविधिक रूपमा सबै तयारी भइसकेको छ। कर्मचारी पनि नियुक्त भएर काममा खटिसकेका छन्,’ महाप्रबन्धक झाले नेपाली हेडलाइनसँग भने, ‘भाडादर पनि निर्धारण भइसकेको छ। तर, सरकारले ल्याएको रेलसम्बन्धी अध्यादेश निष्क्रिय भएपछि नियमति सेवा दिने कुरामा अझ अन्योल बढेको छ।’

जनकपुर-कुर्था-जयनगर प्रतियात्रु सामान्य सिटमा ७० र वातानुकुलित डब्बामा तीन सय रुपैयाँ भाडा निर्धारण गरिएको छ। १४ माघमै रेल सञ्चालनसम्बन्धी अध्यादेश निष्क्रिय भएको झाले जानकारी दिए।

‘आम्दानी नभएसम्म लागत खर्च कम गर्ने उद्देश्यले एक दिन बिराएर रेल चलाउने छौँ,’ महाप्रबन्धक झाले भने, ‘सरकारले कानून नबनाएसम्म एक दिन बिराएर बिनायात्रु रेल सञ्चालन हुन्छ।’

‘ड्राइ रन’ सफलतापूर्वक सञ्चालन भइरहे पनि जनचेतनाको अभाव देखिएको उनले बताए। ‘पशु चौपाया अझै लिकमै हुन्छन्, जसका कारण अहिले ४५ मिनट ढिलो भइरहेको छ,’ उनले भने, ‘रेलवे लिक क्रस गरी बनाइएको बाटोले गर्दा स्लो गतिमा रेल चलाउनुपरेको छ। खाली ठाउँमा ५० र बजार क्षेत्रमा १० देखि १५ किलोमिटर प्रतिघण्टाको गतिमा चल्ने गरेको छ।’

भारतको सरकारी कम्पनी कोंकण रेल्वे कर्पोरेसनबाट खरिद गरिएका दुई सेट रेल २ असोज ०७७ मा नेपाल ल्याइएको थियो। ती रेल सेटको मूल्य ८४ करोड ६५ लाख रुपैयाँ छ। तामझामसहित ल्याइएका दुई सेट रेल धनुषाको जनकनन्दनी गाउँपालिकास्थित इनर्वामा त्रिपाल ओढाएर राखिएको थियो। यी रेलमा एक वातानुकुलितसहित ४-४ वटा बोगी छन्।