भारत छत्तीसगढका मुख्यमन्त्री भुपेश बघेलले बुधबार विधानसभामा आर्थिक वर्ष ०२२–२३ को बजेट प्रस्तुत गरे। तर, उनको बजेटभन्दा ज्यादा चर्चा उनले बोकेको गोबरको ब्रिफकेसले पाएको छ। खासमा, उनले बजेट प्रस्तुती गर्न बोकेको ब्रिफकेस गाईको गोबरले बनेको हो। र, ब्रिफकेसको बाहिरपट्टि लेखिएको छ, ‘गोमय वसते लक्ष्मी’ अर्थात् गाईको गोबरमा लक्ष्मीको बास हुन्छ।

भारतमा पहिलोपटक गाईको गोबरबाट बनाइएको ब्रिफकेसमा राखेर बजेट प्रस्तुत गरिएको हो। हालसम्म भारतमा छाला या जुटबाट बनेको ब्रिफकेसमा राखेर बजेट प्रस्तुत गर्ने प्रचलन छ। मुख्यमन्त्री बघेलले बोकेको ब्रिफकेस रायपुरको गोकुल धामका गोठमा स्वयंसेवा गर्ने महिलाहरूको समूहले बनाएको हो।

ती महिलाहरूका अनुसार ब्रिफकेसमा गोबर पाउडर, चुना पाउडर, काठलगायत सामग्रीको प्रयोगबाट बनाइएको हो। १० दिनको मिहिनेतपछि ब्रिफकेस तयार भएको उनीहरूको भनाइ छ।

हिन्दू धर्मावलम्बीहरूले गाईको गोबरलाई लक्ष्मीको प्रतीक मान्छन्। लक्ष्मीलाई सम्पत्तिकी देवीको रूपमा पूजा गर्ने चलन छ। सोही कारण गाईको गोबरबाट घर, आँगन लिपेर पवित्र मानिने चलन बसेको हो। छत्तीसगढरूपी घरमा मुख्यमन्त्री बघेलले लक्ष्मीको प्रवेश गराउन् भनेर आफूहरूले यस्तो ब्रिफकेस तयार पारेको महिलाहरूको भनाइ छ।

छत्तीसगढमा सन् २०२१ देखि गोधन न्याय योजना शुरु भएको छ। खासगरी पशुपालक कृषकलाई लाभ दिने उद्देश्य यस योजनाको छ। राज्य सरकारले पशुपालकबाट गाईको गोबर खरिद गर्छ र किसानलाई रकम उपलब्ध गराउँछ। वर्षदिनमा धेरै किसानले यसबाट लाभ उठाइसकेका छन्। उक्त गोबरबाट कम्पोस्ट मल बनाइन्छ।