कोरोना भाइरसको संक्रमण घट्दो क्रममा छ। शनिबार ६ हजार ६५४ जनामा कोरोना परीक्षण गर्दा ८३६ जनामा मात्र संक्रमण देखिएको छ।
स्वास्थ्य तथा जनसंख्या मन्त्रालयका अनुसार कुल परीक्षण गरिएकामध्ये १२.६ प्रतिशतमा मात्र संक्रमण देखिएको छ। मन्त्रालयका अनुसार सक्रिय संक्रमितको संख्या २६ हजार १०२ छ।
पछिल्लो समय एक हजार ८२६ जना कोरोनाबाट निको भएर घर फर्किएका छन्। यससँगै निको हुनेको संख्या नौ लाख ३४ हजार ६४८ पुगेको छ। निको हुने दर ९६.१ प्रतिशत रहेको मन्त्रालयले जनाएको छ।
विगत २४ घण्टामा चार जनाको संक्रमणको कारणले मृत्यु भएको छ। हालसम्म ११ हजार ८८२ जनाको संक्रमणका कारणले मृत्यु भएकोे छ। यस्तै, पाँच सयभन्दा बढी संक्रमण भएका जिल्ला १३ वटा छन्।
मन्त्रालयका अनुसार मोरङ, सुनसरी, झापा, धनुषा, काठमाडौं, ललितपुर, भक्तपुर, चितवन, काभ्रे, कास्की, बाँके, रुपन्देही, र कैलालीमा सबैभन्दा बढी संक्रमण देखिएको छ। दुई सयभन्दा बढी संक्रमित भएका १२ जिल्ला छन्। ती हुन्, सिरहा, सप्तरी, पर्सा, बारा, महोत्तरी, सर्लाही, धादिङ, नवलपरासी पूर्व, तनहुँ, पाल्पा, दाङ र र कञ्चनपुर।
मनाङमा संक्रमित संख्या शून्य छ। नेपालमा संक्रमण दर १८.२ प्रतिशत छ। हाल होम आइसोलेसनमा २५ हजार १४१, संस्थागत आइसोलेसनमा १६१, आईसीयूमा दुई सय र भेन्टिलेटरमा ३४ जनाको उपचार भइरहेको छ।
पछिल्लो २४ घण्टामा दुई लाख ८८ हजार ८३७ जनाले कोरोनाविरुद्ध खोप लगाएका छन्। यस्तै, बुस्टर डोज सात लाख १३ हजार ९०५ जनालाई दिइएको छ।
