देशको एक मुख्य सहर वीरगन्जको मध्यभागमा पर्छ, घडिअर्वा पोखरी। ०५२ सालमा वीरगन्ज नगरपालिकाले निर्माण गरेको यो पोखरी १३ पुस ०५६ मा तत्कालीन राजा वीरेन्द्रले उदघाटन गरेका थिए।

त्यसअघिसम्म यो खुला पोखरीका रूपमा थियो। अहिले यो धार्मिक र पर्यटकीय गन्तव्य बनेको छ। करिब पाँच बिघामा फैलिएको पोखरीको मध्यभागमा सूर्य मन्दिर छ, जहाँ दक्षिण एसियाकै ठूलो सूर्य मूर्ति छ। सोही मन्दिरमा गंगाको मूर्ति पनि स्थापना गरिएको छ। हरेक आइतबार साँझ जनकपुरको गंगासागर तथा भारतका वनारस र हरिद्वारमा जस्तै सूर्य–गंगा आरती हुन्छ। गत १ असारदेखि आरती गर्न थालिएको हो।

हरेक वर्ष छठ पर्वको वेला यहाँ मेला लाग्ने गर्छ। छठकै लागि सूर्य र गंगाका मूर्ति स्थापना गरिएको हो। प्रदेश–२ मा जनकपुरस्थित जानकी मन्दिरपछि मुख्य पर्यटकीय गन्तव्य बनेको छ, घडिअर्वा। दैनिक करिब पाँच सयजना पोखरीमा घुम्न आउँछन्।

पोखरी परिसरलाई निगरानी गर्न चारवटै द्वार र अन्य ठाउँमा गरी १२ वटा सिसी क्यामेरा जडान गरिएको छ। आगन्तुकसँग २५ रुपैयाँ शुल्क लिने गरिएको छ। जाडोयाममा भने आगन्तुक संख्या दैनिक करिब चार सयसम्म हुने गर्छ। वीरगन्ज महानगरपालिकाले पोखरीमा नौकाविहारको सुविधा उपलब्ध गराएको छ। सपरिवार छुट्टी मनाउने थलो बनेको छ, यो अहिले। आगन्तुक पोखरी परिसरमा नौकाविहारका साथमा सेल्फी र भ्लग बनाउन व्यस्त देखिन्छन्।

नेपालका काठमाडौं, जनकपुर, विराटनगर, चितवन, नवलपरासी, मकवानपुरसम्मका आगन्तुक यहाँ घुम्न आउँछन्। भारतीय सीमा नजिक पर्ने भएकाले भारतीय पर्यटकको समेत आकर्षणको केन्द्र बनेको छ, यो पोखरी। यहाँ रक्सौललगायत भारतीय सहरका बासिन्दा घुम्न आइपुग्छन्। वीरगन्ज आइपुग्ने आन्तरिक÷बाह्य पर्यटक घडिअर्वाको फेरो नमारी फर्किंदैनन्।

यहाँ आइपुग्ने पर्यटकले मोटरबोट र म्युजिकल फाउन्टेनको मज्जा लिन पाउँछन्। पोखरीको डिलमा रूख–बिरुवा रोपिएको छ। आगन्तुकलाई बस्न सेड निर्माण गरिएको छ। पर्यटकीय गतिविधि बढेसँगै लगानीकर्ताको ध्यान पनि पोखरीआसपासको क्षेत्रमा केन्द्रित देखिन थालेको छ। अग्ला व्यापारिक कम्प्लेक्स निर्माणको क्रम बढेको छ। जनता, ग्लोबल आइएमई, एभरेस्ट र राष्ट्रिय वाणिज्य बैंकले आफ्नो शाखा खोल्न पोखरीवरिपरिको क्षेत्रलाई नै रोजेका छन्। ‘म्याजिक बेल’लगायत महँगा रेस्टुराँ यही क्षेत्रमा खुलेका छन्।

उद्योगी अनील रुंगटालगायतको समूहले यही क्षेत्रमा हालै एक अर्ब रुपैयाँभन्दा बढी लगानीको होटेल ‘दियालो लज प्लाजा’ सञ्चालनमा ल्याएको छ। नजिकै गीता मन्दिर र गोपाल मण्डली पनि छन्। भूमिगत पानी तानेर पोखरीमा हाल्ने गरिएको छ। पोखरीको सुरक्षाका लागि वरिपरि पर्खाल निर्माण गरिएको छ।