काठमाडौं– संस्कृति, पर्यटन तथा नागरिक उड्डयन मन्त्री प्रेम आलेले अहिले नारायणहिटी दरबार संग्रहालयमा क्याफ्टेरिया निर्माणमा पूर्वसंस्कृति मन्त्री योगेश भट्टराईमाथि आक्षेप लगाइरहेका छन्। तर, तथ्य त्यसभन्दा फरक पाइएको छ।

खासमा, ०६६ सालमै सरकारले नारायणहिटीमा क्याफ्टेरिया निर्माणको निर्णय गरेको थियो। त्यसका लागि पहिलो टेन्डर १ चैत ०६६ मा आह्वान गरिएको थियो, जतिबेला प्रधानमन्त्री माधवकुमार नेपाल थिए भने संस्कृति मन्त्री डा. मिनेन्द्र रिजाल थिए।

यस्तै, दोस्रो क्रमागत टेन्डर २४ पुस ०६७ मा भएको थियो। त्यतिबेला प्रधानमन्त्री थिए झलनाथ खनाल र संस्कृति मन्त्री खगेन्द्रप्रसाद प्रसाईं। तेस्रो टेन्डर ०६७ सालमा भएको थियो, जतिबेला प्रधानमन्त्री डा. बाबुराम भट्टराई र संस्कृति मन्त्री गोपाल किराती थिए।

सरकारले ९ मंसिर ०७६ मा नारायणहिटी दरबार संग्रहालय तथा गणतन्त्र स्मारक व्यवस्थापन तथा सञ्चालक समिति गठन गर्ने निर्णय गर्‍यो। त्यतिबेला भने संस्कृति मन्त्री योगेश भट्टराई थिए र प्रधानमन्त्री केपी ओली थिए।

व्यवस्थापन तथा सञ्चालक समिति गठनपछि अध्यक्ष बने संस्कृति, पर्यटन तथा नागरिक उड्डयन मन्त्रालयका तत्कालीन सचिव केदारबहादुर अधिकारी। र, सम्पूर्ण अधिकार सचिवमा केन्द्रित भयो।

१९ फागुन ०७६ मा व्यवस्थापन तथा सञ्चालक समितिका अध्यक्ष एवं मन्त्रालयका सचिव अधिकारीको अध्यक्षतामा बसेको बैठकले टेन्डर आह्वानको निर्णय ग¥यो। सचिव अधिकारीकै निर्देशनअनुसार २६ साउन ०७६ मा टेन्डर आह्वान भयो।

तत्कालीन प्रधानमन्त्री ओलीले ५ पुस ०७७ मा गरेको प्रतिनिधिसभा विघटनको निर्णयप्रति असन्तुष्टि जनाउँदै मन्त्री भट्टराईले सोही दिन राजीनामा दिए। र, १७ पुस ०७७ मा आनन्दराज बतास अध्यक्ष रहेको बीपीएस लिजिङ एन्ड म्यानेजमेन्ट प्रालिसँग सरकारले क्याफ्टेरिया सञ्चालनसम्बन्धी सम्झौता गर्‍यो । त्यतिबेला संस्कृति, पर्यटन तथा नागरिक उड्डयन मन्त्रालय तत्कालीन प्रधानमन्त्री ओलीले नै सम्हालेका थिए।

६ फागुन ०७७ मा सरकारले क्याफ्टेरिया सञ्चालनका लागि कार्यादेश जारी गर्‍यो। त्यतिबेला संस्कृति मन्त्री थिए भानुभक्त ढकाल र प्रधानमन्त्री ओली। अनि भदौ ०७८ मा नारायणहिटी क्षेत्रमा भौतिक संरचना निर्माण शुरु भयो। त्यतिबेला संस्कृति, पर्यटन तथा नागरिक उड्डयन मन्त्रालयको जिम्मेवारी प्रधानमन्त्री शेरबहादुर देउवाकै थियो। र, बतास अर्गानाइजेसनमा सल्लाहकारको भूमिकामा प्रधानमन्त्री देउवा पत्नी डा. आरजु राणाको संलग्नता नयाँ विषय रहेन।