मौसमअनुसार फेसन पनि परिवर्तन हुन्छ । तर, फेसनेबल देखिन चाहनेलाई मौसमले रोक्न सक्दैन । चिसो होस् वा गर्मी, महिलाहरूले स्कार्फ लगाउन सक्छन् । आफ्नो टाउको, अनुहार, कपालको सुरक्षा गर्न पनि स्कार्फले निकै महत्त्वपूर्ण भूमिका खेलेको हुन्छ । समर सिजनमा विशेषगरी सिफनको स्कार्फ बढी प्रचलित छ । त्यसमा पनि फ्लोरेसी प्रिन्टेड स्कार्फ टिनएजरले रुचाउने गरेको पाइन्छ । त्यस्तै, कटनमा फ्रेड वर्क (धागोले बुट्टा भरिएको) स्कार्फ पनि अहिले फेसनमा छ ।

कलरफुल तथा प्रिन्टेड स्कार्फ टिनएजर तथा २५ वर्ष उमेरसम्मका युवतीलाई निकै सुहाउँछ । उनीहरूले स्कार्फ वान पिस, पाइन्ट टिसर्ट, हाफ पाइन्टमा पनि कलर कम्बिनेसन मिलाएर लगाउँदा निकै क्युट देखिन्छ । सिम्पल र सादा कलरका स्कार्फ भने विवाहित महिलाले बढी प्रयोग गर्छन् ।

हाफ पाइन्ट र स्लिभलेस टिसर्ट लगाउने युवतीले भने आफ्नो ब्यागमा स्कार्फ झुन्ड्याएर स्टाइलिस बन्ने गर्छन् । सो स्कार्फ यसरी बोक्नुको फाइदा पनि छ । कपडा बिग्रिएर आपत्कालीन अवस्था आएमा स्कार्फको उपयोग सजिलै गर्न सकिन्छ ।

कलरफुल स्कार्फ पूरै टाउको छोप्ने गरी प्रयोग गर्दा घाम, धुवाँ र धुलोबाट कपालको सुरक्षा गर्न सकिन्छ । साथै, टाउको तथा निधार छोपिनेगरी स्कार्फ लगाएको वेलामा ठूलो आकारको गगल्स प्रयोग गर्दा साँच्चै नै स्मार्ट लुक्स दिन्छ ।

स्कार्फ प्रयोग गर्दा ड्रेस कलर म्याच हुनु पनि उत्तिकै आवश्यक हुन्छ । फ्लोरेसी प्रिन्ट तथा सेम कलरका लाइट र डार्क कलर मिक्स भएका स्कार्र्फ पनि निकै चलेका छन् ।

स्कार्फसँग सुज र ब्यागको कलर कम्बिनेसन पनि मिलाउन सकेमा निकै स्टाइलिस देखिन्छ । त्यसैले ड्रेस या अन्य वस्तुसँग कलर कम्बिनेस मिलाउन सस्तो मूल्यकै स्कार्फ प्रयोग गर्न सकिन्छ । आफ्नो क्षमता र बजेटअनुसार उपयुक्त कलर र डिजाइनका स्कार्फ छनोट गर्न सकिन्छ । त्यसो त बजारमा आफ्नो आवश्यकताअनुसार तीन सय रुपैयाँदेखि एक हजार पाँच सय रुपैयाँसम्मका स्कार्फ खरिद गर्न सकिन्छ ।

हाफ पाइन्ट, स्कार्फ, स्लिपर र सन ग्लास लगाउँदा अझ बढी स्टाइलिस देखाउन ठूलो ब्याग बोक्नु राम्रो हुन्छ । स्कार्फ प्रयोग गर्दा गोलो खालको इयररिंग लगाउनु उपयुक्त हुन्छ । आफूलाई स्टाइलिस देखाउन स्कार्फलाई घाँटीमा बेर्ने, ब्यागमा झुन्ड्याउने गर्दा फरक लुक्स पनि दिन सकिन्छ ।

फर्मल प्रोग्राममा जाँदा मिलाएर फोल्ड गरेर कोटभित्रबाट प्रयोग गर्दा आकर्षक लुक्स दिन्छ । प्रयोग गर्न सजिलो, सस्तो र राम्रो पहिरन स्कार्फलाई धेरै केयर पनि गर्नुपर्दैन । ब्यागमा राख्न पनि यो निकै सजिलो हुन्छ ।

बजारमा २४ इन्च लम्बाइ तथा १८ इन्च चौडाइ भएको स्कार्फ बढी प्रयोग गरिन्छ । यसको लम्बाइ भने ३६ इन्चसम्मको हुन सक्छ । आफूलाई बढी स्टाइलिस र क्युट देखाउन स्कार्फ उपयुक्त पहिरन हो । समरमा स्टाइलिस देखिन स्कार्फ रोज्नु राम्रो हुन्छ ।