नयाँदिल्ली- समोसा बनाउन भारतमा शुरु भएको हो कि पाकिस्तानमा? बिर्यानी भारतीय शहर हैदराबादको हो कि पाकिस्तानी कराँचीको?
पछिल्ला दिनमा भारत र पाकिस्तानमा सामाजिक सञ्जालमा भइरहेका बहस हुन् यी। दुवै मुलकका सामाजिक सञ्जाल प्रयोगकर्ताले पछिल्ला दिनमा भोजनदेखि क्रिकेटसम्म आ-आफ्नो मुलुकको बताउँदै बहस गरिरहेका छन्। त्यसको पछिल्लो कडी हो, चिनियाँ परिकार चिकेन मन्चुरियनको। र, त्यसलाई देशी भर्सन बनाएका छन्, दुवै मुलुकका प्रयोगकर्ताले।
तपाईं कहिल्यै चिकेन मन्चुरियन खाँदै गर्दा त्यो कुन मुलुकको परिकार हो भन्ने सोच्नु भएको छैन होला। भारत र पाकिस्तानका गल्ली र मुख्य बजारमा यो परिकार लोकप्रिय छ। खासगरी, भारतमा त यो पाकिस्तानमा भन्दा लोकप्रिय छ।
तथापि, पाकिस्तानी सामाजिक सञ्जाल प्रयोगकर्ताले यो डिस आफ्नै शहर लाहोरबाट शुरु भएको दाबी गर्दै आएका छन्। भारतीय प्रयोगकर्ताहरू उनीहरूको दाबीसँग असहमत छन्।
केही दिनअघि अमेरिकी अखबार न्युयोर्क टाइम्सले आफ्नो ट्विटर ह्यान्डलमा चिकेन मन्चुरियन बनाउने विधि पोस्ट गरेको थियो। ‘चिनियाँ र पाकिस्तानी खानाको मिलाप। चिकेन मन्चुरियन, जो दक्षिण एसियाका चिनियाँ रेस्टुराँमा साह्रै लोकप्रिय छ,’ अखबारले लेखेको थियो।
त्यसपछि पाकिस्तानी लेखिका जैनब शाहले सन् १९९० को दशकमा लाहोरको रेस्टुराँ ‘सन क्वाङ’मा पहिलोपटक चिकेन मन्चुरियन भित्रिएको दाबी गरेकी थिइन्। र, त्यसपछि मात्र दक्षिण एसियामा फैलिएको उनको दाबी थियो।
त्यसपछि छ के थियो र ! भारतीय सामाजिक सञ्जाल प्रयोगकर्ताहरू न्युयोर्क टाइम्सको त्यस पोस्टमाथि खनिन थालिहाले। र, कमेन्ट सेक्सनमा बहस नै छेडियो।
ट्विटर प्रयोगकर्ता जोया तारिकको दाबीअनुसार पाकिस्तानी-चिनियाँजस्ता चिनियाँ डिस पूरै संसारमा पाइँदैन। पाकिस्तानम बसिरहेका चिनियाँ नागरिकहरू पनि त्यसमा सहमत रहेको उनको दाबी छ।
नायनिका नामक युजरले लेखेकी छन्, ‘नेल्सन वाङ नामक इन्डियन-चिनियाँ सेफले चिकेन मन्चुरियन बनाउन शुरु गरेका हुन्। उनी कोलकातामा जन्मेका थिए। र, उनको रेस्टुराँ मुम्बईमा छ। त्यसैले यो इन्डियन-चिनियाँ डिस हो।’
मनिष नामक युजरले न्युयोर्क टाइम्समाथि आरोप लगाएका छन्, ‘त्यस लेखकी लेखिका पाकिस्तानी हुन्। अनि उनले पाकिस्तानी डिस लेखिन् भन्दैमा जे पनि छापिदिने?’
युजर ब्याटम्यानले न्युयोर्क टाइम्समाथि व्यंग्य गरेका छन्, ‘यो न्युयोर्क टाइम्स हो कि कराँची टाइम्स?’ पाकिस्तानका युजर गुरफान खालिदले भने भारतीयहरू खानेकुरामाथि पनि यतिसारो किन असुरक्षाको भावना राख्छन् भन्दै प्रश्न गरेका छन्।
उनलाई मुख फर्काउँदै एक भारतीय युजरले लेखेका छन्, ‘हाम्रो खाना हाम्रो जिन्दगी हो। यो जिन्दगीको सबैभन्दा महत्त्वपूर्ण चिज हो। हामीलाई हाम्रा खानाप्रति गर्व छ। क्रिकेटभन्दा अधिक, शायद धर्मभन्दा पनि अधिक। त्यसैले भारतीयहरू आफ्ना खानाको रक्षा गर्न चाहन्छन्।’
हुँदाहुँदा एक भारतीय युजरले त यो डिस आफ्नी आमाले शुरु गरेको समेत दाबी गर्न भ्याएका छन्। न्युयोर्क टाइम्सको ट्विटमा दुवै मुलुकका युजरहरू भिडिरहेको देखेका अयमन नामकी प्रयोगकर्ताले लेखमा चिकेन मन्चुरियन पाकिस्तानबाट शुरु भएको नलेखिएको प्रतिक्रिया दिएकी छन्। ‘मेरा साथीहरू के तपाईंहरू सबै ठीक हुनुहुन्छ? चिकेन मन्चुरियनमाथि लडाइँ गर्नूस् अब,’ उनले लेखेकी छन्।
त्यसबारे रोमा नामकी युजरले भारत-पाकिस्तान आगामी लडाइँ चिकेन मन्चुरियनमाथि हुने व्यंग्य गरेकी छन्। ‘सब-मरिनको इन्जिन स्टार्ट गरे भयो त अब?’ उनले प्रश्न गरेकी छन्। चिकेन मन्चुरियन कहाँबाट शुरु भयो भन्ने यकिन कसैले गर्न सकेका छैनन्। तर, दुई मुलुकका युजरबीचको लडाइँ जारी छ। त्यसमाथि टिप्पणी गर्दै एक युजरले लेखेकी छन्, ‘न्युयोर्क टाइम्सले आगो यसरी झोस्यो कि साह्रै मजा आयो।’
