काठमाडौँ । यौन दुर्व्यवहारको आरोपपछि न्युजिल्याण्डका एक टेलिभिजन पत्रकारले पदबाट राजीनामा दिएका छन् ।

वरिष्ठ टेलिभिजन पत्रकार कमहल सान्तामारियाले यौन उत्पीडन र कार्यस्थलमा अनुपयुक्त व्यवहारको आरोप लागेपछि न्युजिल्याण्डको लोकप्रिय समाचार च्यानल टिभिएनजेडबाट आफ्नो पदबाट राजीनामा दिएका छन् ।

यसअघि अल जजिरामा प्रेजेण्टरको रूपमा काम गरिसकेका सान्तामारियालाई सहकर्मीलाई अनुपयुक्त सन्देश पठाउने र धेरै अवसरमा महिलालाई उत्पीडन गरेको आरोप लगाइएको थियो । उनको राजीनामापछि उनलाई टीभीएनजेडमा काममा राख्न जिम्मेवार समाचार प्रमुखले पनि राजीनामा दिएका छन् ।

न्युजिल्याण्डमा पत्रकारको रूपमा आफ्नो क्यारियर सुरु गरेका सन्तामारिया अल जजिराका लागि एक लोकप्रिय व्यक्तित्व थिए । उनले २०२० संयुक्त राज्य अमेरिकाको चुनावको पछिल्लो समयका वर्षमा प्रमुख घटना कभर गरेका थिए ।