काठमाडौँ । दिल्ली उच्च अदालतले रणवीर कपूरको फिल्म ‘शमशेरा’लाई ओटीटीमा रिलिज गर्न अनुमति दिएको छ ।

अदालतले यशराज फिल्मस्लाई अगष्ट २२ सम्ममा अदालतको रजिष्ट्रीमा एक करोड रुपैयाँ जम्मा गर्नसमेत भनेको छ । यो मामला कपी राइट उल्लंघनसँग जोडिएको छ ।

फिल्मको ओटीटी रिलिजसँग जोडिएको मामलामा सुनुवाइ गर्दै न्यायाधीश ज्योति सिंहले विक्रमजीत भुल्लरद्वारा दायर एक मुद्दामा यो आदेश जारी गरिएको हो ।

भुल्लरले फिल्म निर्माताले उनको साहित्यिक कृति ‘कबहु ना छाडे खेत’को कपीराइट उल्लंघन गरेको दाबी गरेका छन् । अदालतले तोकिएको समयमा पैसा जम्मा नगरे ओटीटीमा फिल्म प्रसारणमा रोक लगाउने र त्यो अगष्ट २३ बाट कार्यान्वयन हुने बताएको छ ।