काठमाडौं- भारत र चीनबीच सिनेमामा पहिलो सहकार्य भएको छ। विश्वविख्यात कुङ्फु स्टार ब्रुस लीको सम्मानमा बनाइएको सिनेमा ‘इन्टर द ड्र्यागन गर्ल’मा दुई देशका निर्देशक, कलाकारले सहकार्य गरेका हुन्।
उक्त सिनेमा १५ जुलाईदेखि चिनियाँ भूमिमा रिलिज भएको छ। भारतीय निर्देशक रामगोपाल बर्मा र चिनियाँ निर्देशक लिउ चिङले सह–निर्देशन गरेको चलचित्रमा अभिनेत्री पूजा भालेकरको एक्सन देख्न सकिन्छ। उनी एसियाली तेक्वान्दो च्याम्पियन पनि हुन्। उनले चलचित्रमा उत्कृष्ट प्रस्तुतीका लागि तीन वर्षसम्म कुङ्फुलगायत सम्बन्धित विषयमाथि अभ्यास गरेकी थिइन्।
यस चलचित्रकी मुख्यपात्र पूजाले आफ्नी बहिनीलाई कसैले धम्क्याएको देख्छिन् तर केही गर्न नसकेकोमा आत्मग्लानी महशुस गर्छिन्। तब उनले ब्रुस लीको चलचित्र ‘इन्टर द ड्र्यागन’ हेरेपछि आत्मविश्वास विकास गर्दै चिनियाँ कुन डो मार्सल आर्ट मास्टरको प्रशिक्षणमा अभ्यस्त हुन्छिन्।
चिनियाँ सञ्चार माध्यमहरूका अनुसार चीन र भारतबीचको सहकार्यमा निर्मित यो चलचित्र चीनको क्वाङतोङ प्रान्तमा प्रथम प्रदर्शन गरिएको छ। मूलतः चीन र भारतका चर्चित कलाकारका साथै दुई देशबीच सम्बन्ध सुधारको एउटा किस्साका रूपमा पनि यसलाई अर्थ्याइएको छ।
