नेपाली सिनेमा ‘कबड्डी-४’लाई भारतको सिक्किममा प्रदर्शन गर्न नदिन माग गरिएको छ। सिक्किमका बौद्ध धर्मगुरु ओङ्दी पिन्त्सोले राजधानी गान्तोकमा पत्रकार सम्मेलन गर्दै फिल्म प्रदर्शनमा रोक लगाउन स्थानीय प्रशासनसँग आग्रह गरेका हुन्।
पिन्त्सोले भने, ‘यदि रिलिज भएको खण्डमा सबै लामाहरू सडकमा उत्रिनेछन् र हल तोडफोड भए त्यसको जिम्मेवार हामी हुने छैनौं।’
गत साता काठमाडौंस्थित सिभिल मलको कफी सपमा फिल्मकी अभिनेत्री मिरुना मगरले नेपाली बौद्ध भिक्षु बौद्ध भिक्षु फुर्वा तामाङलाई आफूमाथि दुर्व्यवहार गरेको आरोप लगाउँदै थप्पड हानेकी थिइन्। त्यसबाट बौद्ध धर्म र भिक्षुमाथि अन्याय भएको दाबी सिक्किमका बौद्ध भिक्षुले दाबी गरेका छन्।
‘वास्तवमा बौद्ध धर्म र भिक्षुलाई अन्याय भएको छ। यसविरुद्ध सबैले आवाज उठाउनु जरुरी छ,’ उनले पत्रकार सम्मेलनमा भने, ‘नेपालमा समेत विवाद समाधान हुनुपर्ने हाम्रो आग्रह छ।’
सिक्किममा ‘कबड्डी ४’लाई १७ जुनमा रिलिज गर्ने तयारी छ। अभिनेत्री मगरको उजुरीपछि प्रहरीले फुर्वालाई पक्राउ गरेको थियो। रिहा गर्नुपर्ने भन्दै प्रदर्शन चर्किएपछि तीन हजार रुपैयाँ धरौटीमा फुर्वालाई रिहा गरियो र दुवैले सहमतिपत्रमा हस्ताक्षर पनि गरे। नेपालमा विवाद समाप्त भए पनि सिक्किममा यो प्रकरणले विवादको रूप लिएको छ।
