बलिउड गायक केके (कृष्णकुमार कुननाथ)को मंगलबार कोलकातामा लाइभ कन्सर्टपछि ५३ वर्षको उमेरमा निधन भएको छ।
कन्सर्टमै बिरामी परेका उनलाई सीएमआरआई (कोलकाता मेडिकल रिसर्च इन्स्टिच्युट) अस्पताल लगियो। तर, अस्पताल पुग्नुअघि नै उनको मृत्यु भइसकेको चिकित्सकले घोषणा गरे।
भारतीय सञ्चार माध्यमका अनुसार उनको टाउकोमा चोट लागेको देखिएको छ। त्यसैले प्रहरीले अप्राकृतिक मृत्युको मुद्दा दर्ता गरेको छ। यस मुद्दामा कन्सर्टका सीसीटीभी तस्बिरहरू जाँच गरिने प्रहरीले जनाएको छ।
केकेको निधनप्रति प्रधानमन्त्री नरेन्द्र मोदीले ट्विटरमार्फत दुःख व्यक्त गरेका छन्। उनले लेखेका छन्, ‘केकेको निधनले म दुःखित छु। उनका गीतमा सबै उमेरका मानिस जोडिएका छन्। उनी आफ्ना गीतहरूमार्फत सधैं हाम्रो हृदयमा जीवित रहनेछन्। भगवानले उनको परिवारलाई शक्ति प्रदान गरून्।’
को हुन् केके ?
२३ अगस्ट १९६८ मा दिल्लीमा जन्मेका चर्चित पार्श्व गायक कृष्णकुमार कुननाथलाई बलिउड संगीत उद्योगमा केके भनेर चिनिन्छ। उनले हिन्दी मात्रै होइन तमिल, तेलगु, कन्नड, मलयालम, मराठी, बंगाली र गुजराती चलचित्रका गीत पनि गाएका छन्। यससँगै केकेले फिल्ममा ब्रेक पाउनुअघि करिब ३५ हजार जिंगल पनि गाएका थिए।
सन् २०२१ मा केकेलाई ‘मिर्ची म्युजिक’ अवार्डबाट सम्मानित गरिएको थियो। उनले दिल्लीको माउन्ट सेन्टमेरी स्कूलमा अध्ययन गरे र दिल्ली विश्वविद्यालयको किरोरी मल कलेजबाट स्नातक गरेका थिए।
सन् १९९९ मा क्रिकेट विश्वकपको बेला केकेले भारतीय टोलीलाई समर्थन गर्न ‘जोस अफ इन्डिया’ गीत गाएका थिए। उनको यो गीतमा धेरै भारतीय क्रिकेटर पनि देखिएका थिए। केकेले म्युजिक एल्बम ‘पल’बाट आफ्नो गायन करिअर शुरु गरेका थिए।
बलिउड प्रवेश
केकेको बलिउडमा सिनेमा ‘माचिस’ को ‘छोड आए हम’ गीतबाट डेब्यु गरेका थिए। उनले फिल्म ‘हम दिल दे चुके सनम’ को ‘तडप तडप’ गीतबाट ठूलो ब्रेक पाएका थिए। यसबाहेक केकेले ‘यारो’, ‘पल’, ‘कोई कहेते रहे’, ‘मैने दिलसे कहा’, ‘आवरापन बञ्जारापन’, ‘दस बहाने’, ‘अजब सी’, ‘खुदा जाने’जस्ता गीतहरूमा आवाज दिएका छन्।
सन् २००० मा केकेले फिल्म ‘हम दिल दे चुके सनम’को ‘तड–तडप’ गीतका लागि सर्वश्रेष्ठ पार्श्व गायक घोषित हुँदै ‘गिल्ड फिल्म अवार्ड’ प्राप्त गरेका थिए। सन् २००८ मा ओम शान्ति ओमको ‘आँखों मे तेरी’ र सन् २००९ मा ‘बचना–ए हसिनों’ र ‘खुदा जाने’का लागि उत्कृष्ट पार्श्व गायकको अवार्ड पनि जितेका थिए।
