कैलाली । रसुवा जिल्लामा आएको विनाशकारी बाढीबाट ठूलो जनधनको क्षति भएपछि सरकारले सहयोगका लागि गरेको आह्वानमा धनगढीका निजी अस्पतालहरू पनि सहयोगमा जुटेका छन्।
धनगढीका निसर्ग अस्पताल, कैलाली अस्पताल, मायामेट्रो अस्पताल, नवजीवन अस्पताल र केयर टेकर अस्पतालले मानवीय सेवाको भावनासहित प्रधानमन्त्री दैवी प्रकोप उद्धार कोषमा आर्थिक सहयोग जम्मा गरेका हुन्।
सहयोग गर्ने अस्पतालहरूमा निसर्ग अस्पतालले रु. ११ लाख ११ हजार १११, मायामेट्रो अस्पतालले रु. ३ लाख ११ हजार १११, नवजीवन अस्पतालले रु. २ लाख २२ हजार २२२, कैलाली अस्पतालले रु. १ लाख ११ हजार १११ र केयर टेकर अस्पतालले रु. १ लाख १ हजार १०१सहयोग गरेका छन्।
यसरी पाँचवटा अस्पतालबाट मात्रै कुल रु. १८ लाख ५६ हजार ६५६ प्रधानमन्त्री दैवी प्रकोप उद्धार कोषमा जम्मा भएको छ।
निसर्ग अस्पतालका अध्यक्ष तीर्थराज पन्तले विपत्तिको समयमा पीडित नागरिकको साथमा उभिनु सबैको सामाजिक दायित्व भएको बताए।
उनले भने, “विपत्तिमा परेका नागरिकलाई सहयोग गर्नु मानवताको कर्तव्य हो। सरकारको आह्वानअनुसार अस्पतालको तर्फबाट सक्दो सहयोग गरेका हौँ। हाम्रो सानो सहयोगले पीडितको उद्धार र राहतमा केही भए पनि योगदान पुग्ने विश्वास छ।”
त्यस्तै, कैलाली अस्पतालका अध्यक्ष जनकराज जोशीले प्राकृतिक विपत्तिको पीडामा मलम लगाउन निजी क्षेत्र पनि जिम्मेवार भएर अघि बढ्नुपर्ने बताए।
उनले भने, “विपद् कसैको व्यक्तिगत समस्या होइन, यो सबैको साझा पीडा हो। यस्तो कठिन समयमा राज्यलाई सहयोग गर्नु हाम्रो सामाजिक उत्तरदायित्व पनि हो। आगामी दिनमा पनि आवश्यक सहयोगका लागि हामी तयार छौँ।”
रसुवामा आएको बाढीले ठूलो क्षति पुर्याएको अवस्थामा धनगढीका निजी अस्पतालहरूले देखाएको यो सहयोगले स्वास्थ्य क्षेत्र केवल उपचारमा मात्र सीमित नभई विपद्को समयमा मानवीय सेवामा समेत अग्रसर हुनुपर्छ भन्ने सकारात्मक सन्देश दिएको छ।
