काठमाडौं- आज २४ मे। विश्व इतिहासका असंख्य घटनाले देश, क्षेत्र र स्थान विशेषमा आजको दिन स्मरण गराउँछन्। प्रस्तुत छ, केही विश्व चर्चित घटनाको सारसंक्षेप।
– सन् १९३०- इंग्ल्यान्डबाट अस्ट्रेलियाको सोलो उडान
सन् १९३० मा आजकै दिन एमी जोनसनले इंग्ल्यान्डबाट अस्ट्रेलियासम्मको सोलो उडान शुरु गरेकी थिइन्। बेलायती पाइलट जोनसन उक्त रुटमा सोलो उडान गर्ने पहिलो महिला थिइन्। त्यस क्रममा उनले १८ हजार किलोमिटरको हवाई यात्रा तय गरेकी थिइन्। उनी सवार ‘डे हेभिल्यान्ड जिप्सी मोथ’ जहाजले उनलाई १९ दिनमा बेलायतको क्रोयडनबाट अस्ट्रेलियाको डार्विन पुर्याएको थियो।
– सन् १९७०- संसारकै गहिरो कृत्रिम खाडल
सन् १९७० मा आजकै दिन इन्जिनियरहरूको एक समूहले संसारकै गहिरो खाडल खन्न शुरु गरेका थिए। रुसको मुर्मान्स्क ओब्लास्टमा खन्न शुरु गरिएको उक्त खाडल बजेटको कमीका कारण पछि खन्न बन्द गर्नुपरेको थियो। ‘कोला सुपरदीप बोरहोल’का नामले चिनिने उक्त खाडल १२ हजार २६२ मिटरसम्म पुगेपछि खन्न बन्द गरिएको थियो।
– सन् २००१- बिहे हल विनाशमा २३ को मृत्यु
इजरायलको जेरुसलेममा आजकै दिन भएको दुर्घटनामा २३ जना मारिएका थिए। एक विवाह पार्टी भइरहेको हल रहेको तीनतले भवनको तेस्रो तला भत्किँदा उक्त दुर्घटना भएको थियो। पार्टीमा सहभागी जन्ती र बेहुलीका माइतीहरू त्यसमा पुरिएका थिए। अरूलाई उद्धार गर्न सफलता प्राप्त भए पनि २३ जनालाई बचाउन सकिएन।
– सन् २००४- उत्तर कोरियामा मोबाइलमाथि प्रतिबन्ध
उत्तर कोरियाले आजकै दिन मोबाइल आयात र प्रयोगमाथि प्रतिबन्ध लगाएको थियो। पछि उक्त प्रतिबन्ध त हटाइयो। तर, अझै पनि सरकारी अनुमति बेगर मोबाइल बोक्न त्यहाँका नागरिकले पाउँदैनन्। मोबाइल सेवा प्रदायक कम्पनीहरू माथि पनि कडा सरकारी निगरानी छ।
– सन् २०१८- विश्वकै ठूलो क्याट-प्रुफ फेन्सिङ
सन् २०१८ मा आजकै दिन अस्ट्रेलियामा विश्वकै ठूलो क्याट-प्रुफ फेन्सिङ निर्माण सम्पन्न भएको थियो। अस्ट्रेलियाको मध्य क्षेत्रस्थित न्युहेभन वाइल्डलाइफ स्यांक्चुरीमा संकटापन्न वन्यजन्तुको सुरक्षाका लागि ४४ किलोमिटर लामो फेन्सिङ गरिएको थियो।
– सन् २०१८- जंगली कुकुरको आक्रमणमा १४ बालबालिका मारिए
सन् २०१८ मा आजकै दिन भारतको खरिदाबादमा जंगली कुकुरहरूको आक्रमणमा परी १४ बालबालिका मारिएका थिए।
– सन् २०२२- अमेरिकामा मारिए १९ बालबालिका
सन् २०२२ मा आजकै दिन अमेरिकी राज्य टेक्सासको उभाल्डेस्थित रोब इलेमेन्टरी स्कुलमा एक बन्दुकधारीले १९ जना बालबालिकाको ज्यान लिएका थिए। १८ वर्षका बन्दुकधारीले अन्धाधुन्द गोली चलाउँदा अबोध बालबालिकाको ज्यान गएको थियो।
– सन् २०२३- सम्भावित एलियन ट्रान्समिसनको परीक्षण
मंगल ग्रहको परिक्रमा गरिएको अन्तरिक्ष यानले पृथ्वीमा एक सन्देश पठाएको थियो, जो ब्रह्माण्डमा एलियनको उपस्थितिसम्बन्धी थियो। र, त्यसलाई आजकै दिन डिकोड गर्ने परीक्षण गरिएको थियो। तथापि, मानिसले त्यसलाई डिकोड गर्न सफलता पाएका छैनन्।
– सन् २०२३- पक्षघात भएका व्यक्तिको प्राकृतिक हिँडाइ
सन् २०२३ मा मेडिकल इतिहासमा एक ठूलो सफलता प्राप्त भएको थियो। पक्षघातबाट पीडित व्यक्तिलाई प्राकृतिक रूपमा हिँडडुल गराउन चिकित्सकहरू सफल भएका थिए। त्यो १२ वर्षदेखि स्विस टोलीले गरिरहेको परीक्षण प्राप्त भएको थियो। ‘नेचर’ जर्नलमा प्रकाशित रिपोर्टअनुसार मस्तिष्क र स्पाइनल कर्डबीच विकास गरिएको न्युरोलोजिकल लिंकको परिणाम थियो त्यो।
– सन् २०२५- इरानी फिल्मले जित्यो कान्स अवार्ड
सन् २०२५ मा आजकै दिन इरानी निर्देशक जाफर पहानीको फिल्म “अन सिम्पल एक्सिडेन्ट”ले ७८ औं कान्स फिल्म फेस्टिभलमा अवार्ड जितेको थियो। उक्त फिल्मले पाम डिओर अवार्ड प्राप्त गरेको थियो।